Në Shqipëri u shtuan ndjeshëm gjatë janarit vdekjet dhe infektimet nga Covid-19, ndërsa sot pritet të mbërrijnë në Tiranë dërgesat e para të vaksinës sipas kontratës nga kompania Pfizer.
Ndërkaq studiuesit e pavarur pohojnë se qytetarët nuk po informohen sa duhet për vaksinën dhe masat shtetërore për të.
Në Tiranë pritet të mbërrijë sot në mbrëmje dërgesa e vaksinave anti-Covid nga Pfizer, ndërsa numrat e qytetarëve të vdekur dhe të infektuar sa vjen e rriten.
Sipas zyrtarëve, sasia, që mbërrin sot, është më e pakët nga sa ishte planifikuar të mbërrinte në mesin e janarit, megjithatë zyrtarët pohojnë që kjo vonesë nuk e vë në pikëpyetje skenarin për vaksinim 14 mujor të popullatës.
Ashtu si 900 vaksinat që u siguruan në fillim të janarit, edhe vaksinat që vijnë sot do të shkojnë për personelin shëndetësor të Shqipërisë, së bashku me ta do të vaksinohen paralelisht edhe grupet e para nga moshat e treta.
Duke iu referuar studimit më të fundit të revistës Monitor, Presidenti i Shqipërisë, Ilir Meta, shprehu shqetësimin se në raport me popullsinë, Shqipëria zuri vendin e parë në Europë për numrin e jetëve të humbura nga COVID-19.
Zoti Meta shkroi në rrjetet sociale se plani i masave për përballjen e pandemisë ka dështuar dhe i bëri thirrje qeverisë për të ndalur propagandën dhe për të hartuar një plan konkret afagjatë, për menaxhimin efikas të situatës.
Presidenti Meta kërkoi të ndalohen pagesat buxhetore për PPP-ve dhe fondet të përdoren për shëndetin e qytetarëve.
Komiteti Teknik i përballjes me pandeminë, pohoi se shifrat e infektimit janë rritur gradualisht në të gjithë vendin gjatë janarit.
Nga ana tjetër, veprimtarë dhe studiues të fushës së shëndetësisë bënë thirrje që zyrtarët të shtojnë informimin mbi vaksinën dhe fushatën e vaksinimit në mënyrë që të rritet gadishmëria për vaksinim.
Arlinda Shehu, menaxhere programesh nga shoqata together for life, thotë se nga studimet europiane ka dalë që kur ulet informimi, ulet edhe vaksinimi.
Shqipëria arriti 3 ditë më parë një rekord vjetor me mbi 900 persona të infektuar rishtas në ditë dhe vdekjet po ashtu arritën në nivele të reja.
Krahas shtimit të testeve, tani qytetarët e kanë kthyer vëmendjen nga vaksina dhe presin ta bëjnë sa më parë atë, ndonëse në rrugë, mjedise publike dhe vendet e punës nuk bëjnë kujdes kujdes sa duhet për tu vetëmbrojtur./VOA
