Ditën e sotme mblidhet Komisioni për Çështjet Europiane i Dhomës së dytë të Parlamentit Holandez. Mbledhja pritet të zgjasë dy orë dhe do të diskutohet mbi këshillin e datës 22 qershor në Bruksel.
Komisioni do të marrë vendimin dhe për qëndrimin që do mbajë për Shqipërinë në datë 22 qershor, lidhur me zhvillimin e konferencën së parë ndërqeveritare, për t’i hapur rrugë integrimit në Bashkimin Europian.
E pranishme do të jetë ministrja e Punëve të Jashtme të Holandës, zonja Sam Kaag, e cila edhe më herët e ka deklaruar mbështetjen e qeverisë holandeze lidhur me mbajtjen e Konferencës së parë Ndërqeveritare për Shqipërinë ku sipas saj duhej zhvilluar sa më shpejt. Tema për Shqipërinë është vendosur në fund të axhendës së Komisionit. Sinjalet janë pozitive dhe shpresat për një dritë jeshile nga ana e Holandës janë të mëdha.
Kujtojmë që më datë 5 qershor qeveria holandeze i dërgoi një letër raport Komisionit ku del në konkluzionin se shumë prej kushteve që ka pasur Holanda ndaj Shqipërisë janë plotësuar. Ndërkohë nga ana tjetër ministrja e Punëve të Jashtme, Olta Xhaçka ka falënderuar homologun e saj portugez për mbështetjen dhe përpjekjet për të çuar përpara integrimin e Shqipërisë në BE.
Xhaçka u shpreh se shpreson që Konferenca e Parë Ndërqeveritare të zhvillohet ashtu siç është premtuar, sa më parë. “Një telefonatë mjaft e frytshme me ministrin e Punëve të Jashtme të Portugalisë, Augusto Santos Silva. Shpreha mirënjohjen për përpjekjet dhe dashamirësinë për të çuar përpara integrimin e Shqipërisë dhe të gjithë Ballkanit Perëndimor në BE. Shpresojmë që Konferenca e Parë Ndërqeveritare të zhvillohet ashtu siç është premtuar, për t’i hapur rrugën Shqipërisë për të vazhduar përpara”, shkruajti Xhaçka në Twitter.
