Kryeministri Edi Rama ditën e sotme në fjalën e tij në takimin e radhës, që ishte online për Procesin e Berlinit, ishte mjaft i ashpër me Bashkimin Europian, ndërsa për kancelaren Merkel kishte vetëm falënderime.
“Faleminderit shumë Angela. Pikësëpari do të doja të të falenderoja shumë sinqerisht për nisjen dhe mbështetjen gjatë tërë kësaj kohe të këtij procesi, e për angazhimin tuaj të fortë e të palëkundur për rajonin tonë.
E di që nuk të pëlqejnë lëvdatat, por faktikisht mendoj që procesi që nisët ka qenë vërtetë shumë I rëndësishëm për të mbajtur gjallë atë që, meqë ra fjala, BE-ja po e shuan, flakën e shpresës tek e ardhmja” i tha Rama.
Në fund të fjalës së kreut të ekzekutivit shqiptar, kancelarja gjermane u shpreh se shpreson te progresi në të ardhmen, referuar hapjes së negociatave, proces që dështoi sërish në qershor.
“Faleminderit i dashur Edi për tablonë mjaft të drejtpërdrejtë sipas këndvështrimit tuaj. Kemi folur së fundi në telefon dhe shpresojmë që do të bëjmë progres” tha Merkel.
