As efektivët e policisë së qarkullimit rrugor, nuk mundën të zhbllokonin trafikun e rënduar në kryqytet këtë të enjte në Tiranë. Prej dy ditësh, qindra makina presin me orë të tëra për të qarkulluar në kryeqytet duke krijuar kaos të plotë dhe lëvizja e tyre është thuajse e pamundur.
Njësoj sikur dje, ditën e sotme reshjet e shiut paralizuan edhe më tepër trafikun në Tiranë. Rrugët kryesore të kryeqytetit janë përballur me varg kilometrik të makinave që mezi lëvizin, e kjo pamje është e zakonshme në rrugët e Tiranës, duke u kthyer në një makth për drejtuesit e mjeteve.
E vështirë dhe shumë shqetësuese janë lëvizja e ambulancave dhe zjarrfikëseve apo dhe mjeteve të policisë, pasi ato mbeten të “zhytura” në trafik dhe e kanë të pamundur lëvizjen pas autokolonave të pafund makinash.
Mjetet e transportit publik të kontraktuara nga bashkia rëndojnë edhe më shumë ajrin dhe trafikun, ndërsa flota e autobusave “Go Green” që bëjnë zhurmë si zetor edhe pse deklarohen “hibrid” apo elektrik, është një tallje e jashtzakonshme me inteligjencën qytetare. Veliaj i trajton qytetarët e Tiranës si të paditur, duke i prezantuar një flotë të vjetër autobuzësh si hibride, që nuk ndot ambientin me dioksid karboni dhe as nuk shkakton ndotje akustike, në fakt ndodh e kundërta.
Nëse Veliaj nuk e di, dikush duhet t’ia sqaroj se flota e vjetër e autobuzëve që na prezanton si sukses, me kalimin e viteve e humb funksionin e tyre dhe konsumon karburant njësoj si çdo mjet tjetër dhe ndaj motori i tyre punon si zetor e aspak si një mjet i standardeve europiane që kanë si qëllim uljen e ndotjes në ambjent.
Trafiku më i rënduar është kryesisht ditët me shi, por tashmë të qëndrosh në trafik për orë të tëra është kthyer në mënyrë jetese. kryesisht në fashot e orari të mëngjesit kur pjesa më e madhe e drejtuesve përcjellin fëmijët në shkolla apo shkojnë në punë, në mesditë kur nisja qarkullimi i mjeteve të punës që vijnë dhe nga rrethinat apo qytetet e tjera, në mesditë kur drejtuesit kthehen nga puna apo marrin fëmijët e tyre të mitur nga turni i parë, i dytë apo i tretë nga shkolla dhe sërish në orët e darkës, gjithë ditën e ditës… një Zot e di se pse?!
Në fakt ne e dimë pse, sepse Tirana drejtohet nga njerëz të papërgjegjshëm, kryebashkiak mediokër, e në asnjë vend nuk e kemi pa këtë lloj babëzie për betonin si kryebashkiaku Erion Veliaj. Madje edhe Durrësi që u mbulua me beton, e u trajtua nga socialisti Vangjush Dako si mall pa zot, nuk krahasohet me masakrën mjedisore që i ka shkaktuar Erion Veliaj kryeqytetit.
Kudo pallate dhe kulla dhjetra kate që ngrihen papushim, tulla, hekura, beton, rrugë të mbushura me dhe e zhavorr. Rrugë që qepen e shkepen me xhepat e shqiptarëve për oreks të firmave të ndërtimit dhe oligarkëve që mbajnë peng kryebashkiakun, të cilët e kanë kthyer Tiranën kryeqytetin më të ndotur në Europë! Asnjë firmë ndërtimi nuk paguan zhdëmtimin për shkatërrimin e rrugëve nga lëvizja e makinave të tonazhit të rëndë që transportojnë rërë dhe zhavor. Asnjëra prej tyre nuk paguan para për kanalizime apo elektrifikim, kjo u bëhet “dhuratë” nga bashkia, me paratë e qytetarëve të Tiranës.
Veliaj është një kryebashkiak pa vizion, i cili nuk ndërton rrugë të reja, nuk ndërton sisteme transporti publik për t’i dhënë zgjidhje qytetarëve që e mallkojnë nga mëngjesi në darkë, por është i investuar qysh prej ditës që ka shkelur në ambientet e bashkisë të mbjell beton. Veliaj është modeli tipik se si s’duhet të jetë një kryebashkiak.
Erion Veliaj mund të jetë kryebashkiaku më i urryer në historinë e shtetit shqiptar, madje më shumë se Lulzim Basha! A e dini pse? Sepse nëse Basha zgjodhi të flej gjumë e “nuk vendosi asnjë tullë”, të paktën duke fjetur e duke mos përfunduar asnjë punë publike, nuk i shkaktoi dëme të pariparueshme kryeqytetit. Prandaj duke i qëndruar logjikës së kryeministrit, “më mirë djepin bosh se shejtanin brenda”./Ekskluzive.al
