Ish-presidenti Bamir Topi dje në një dalje televizive komentoi marrëdhënien Basha-Berisha si dhe zhvillimet e fundit në PD.
Topi tha se Berisha ka qenë gjithmonë njeri që ekspozohej për interesat e tij por për interesat e partisë ai hesht. Ai u shpreh se tani që Berishës i është prekur lëkura, është vendosur në pozicion satirik.
Ish-kreu i FRD po ashtu komentoi edhe thirrjen e Kuvendit Kombëtar të PD nga Berisha. Sipas tij, mënyra e deklarimit për Kuvendin e nxjerr ish-kryeministrin jashtëzakonisht keq. “Berisha ka qenë një njeri që gjithmonë është ekspozuar, por për gjërat që kanë të bëjnë me ekzistencën e PD dhe kryetarit të partisë, ai hesht. Ndërsa tani kur është prekur lëkura e tij është vendosur në një pozicion satirik.
Unë i gjykoj të dy si një person të vetëm. Njëri është pjellë i tjetrit. Të dy kanë bashkëqeverisur. Këto situata e kanë ulur shumë figurën e Berishës. Mënyra e deklarimit për Kuvendin Kombëtar, e nxjerr Berishën jashtëzakonisht keq. Në eksperiencën e tij ai duhet të kuptonte se po fliste për një proces që do të jetë i implikuar vetë, mua më duket si një njeri që ka në dorë jo vetëm PD, por edhe procedurat”, tha Topi.
Lidhur me Foltoren, ish-presidenti tha se është një komunikim nga halli teksa shtoi se binomi Basha-Berisha nuk di kë të bëjë përgjegjës për situatën aktuale në PD. Topi u shpreh se Basha me përjashtimin e Berishës dhe nisjen e Foltores ishte pak i tronditur por tani është më i qetë dhe shpreson tek diçka.
Sipas ish-presidentit, mund të ketë një proces gjyqësor mes të dyve për vulën e partisë teksa shtoi se nuk po i bëhet më opozitë Ramës. “Foltorja është një komunikim prej halli, por jo se nuk ka të drejtë në raport me drejtimin e PD, por e gjithë kjo mbyllet në binomin Berisha-Basha, ata të dy s’kanë kujt t’ia hedhin përgjegjësinë për këtë punë. Basha kur lajmëroi përjashtimin e Berishës ishte shumë i tronditur.
Nga ana tjetër filloi të tronditej edhe nga nisja e procesit të foltores. Ndërsa tani duket më i qetë, diku ai shpreson. Mund të ndodhë që të kenë një proces gjyqësor për vulën e partisë. Të dy e kanë braktisur kauzën, nuk ka më opozitë që i bëhet Ramës”, tha ai.
