Gjykata e Lartë ka zbardhur vendimin për ish-ministrin Saimir Tahiri. Pak javë më parë kjo gjykatë vendosi të rikthejë në Apel çështjen ndaj Tahirit, i cili është dënuar me shërbim prove për shpërdorim detyre.
Në 2017 nisi një proces hetimor ndaj tij dhe prokuroria ngriti disa akuza penale, mes të cilave trafiku i drogës dhe përfshirja në organizata kriminale. Për Tahirin u kërkuan 12 vite burg. Por Gjykata e Shkallës së Parë për Krimet e Rënda, ndryshoi akuzën në atë kohë dhe e dënoi Tahirin me 5 vite burg (të konvertuar në shërbim prove), për “Shpërdorim detyre”.
Këtë akuzë prokuroria nuk e kishte ngritur, por e vendosi gjykata. Apeli e cilësoi si të gabuar një gjë të tillë, duke thënë se i takon prokurorisë caktimi i akuzës dhe e ktheu për rigjykim rastin. Mirëpo Tahiri e ankimoi vendimin në Gjykatën e Lartë dhe kjo e fundit vendosi që çështja të mbetet në Apel.
Arsyeja se përse u kthye është sepse një nga gjyqtaret, e konkretisht e cila Albana Boksi ka pasur konflikt interesi. Mirëpo në vendimin e zbardhur, Gjykata e Lartë legjitimoi vendimin e Shkallës së Parë, duke deklaruar se ajo ka të drejtë të ndryshojë akuzën.
“Kolegji vlerëson se vendimi i Gjykatës së Shkallës së Parë për Krime të Rënda Tiranë, ndryshe nga sa ka konkluduar Gjykata e Posaçme e Apelit për Krimet e Rënda në vendimin objekt rekursi, është marrë në interpretim dhe zbatim të drejtë të ligjit procedural penal, neneve 372 – 376 të Kodit të Procedurës Penale, në të cilat rregullohen normat procedurale penale lidhur me paraqitjen e akuzave të reja gjatë procesit gjyqësor penal.
Një zgjidhje e tillë është edhe në përputhje me vendimin e Gjykatës Kushtetuese nr. 4, datë 10.2.2012. Kolegji vlerëson se rrethanat ligjore të çështjes së paraqitur për gjykim në Gjykatën e Posaçme të Apelit nuk kanë qenë të tilla që të justifikojnë kthimin e çështjes për rigjykim në Gjykatën e Shkallës së Parë”, thuhet në vendim.
Pra tashmë Gjykata e Posaçme e Apelit do të duhet të rishqyrtojë rastin, por me një trupë të re gjyqësore dhe sipas argumenteve të Gjykatës së Lartë, nuk ka shkelje me ndryshimin e akuzës.
