Një aksident tragjik iu mori jetën sot 45 shqiptarëve nga Maqedonia e Veriut.
Lidhur me këtë ngjarje tragjike ka reaguar për “Shqipëria Live” një i afërm i viktimave, Xheladin Ahmeti, i cili tha se ka humbur 12 familjarë.
“Familja ime humbi 12 anëtarë, jam i tronditur. Biseda e fundit me ta ka qenë 30 minuta para se të ndodhte aksidenti dhe thonin se çdo gjë është mirë. Unë e mora vesh lajmin në 6 të mëngjesit. Kam do shokë në Bullgari dhe thanë se nga 4 autobusë 1 ka marrë flakë.
Pastaj morëm vesh se çfarë ka ndodhur. Një i afërm që ka mbijetuar ka humbur 4 fëmijë dhe të shoqen. Është e vështirë t’u tregosh çfarë ka ndodhur”, tha Ahmeti.
Ky i fundit u shpreh se nuk ka folur dot me personat që kanë mbijetuar nga ky aksident tragjik, por me familjarët e tyre. Sipas tij, kjo është një tragjedi dhe nuk është e para që ka ndodhur.
“Te ne nuk funksionon ligji. Të shikoni çfarë autobusësh janë, as për në lagje nuk duhet të licencohen. As kondicioneri nuk funksiononte, janë të vjetër”, tha Ahmeti.
