Pas rileximit në skenën e Teatrit Kombëtar të veprës “Prefekti” debatet mbi figurën e Qazim Mulletit kanë qenë shumë të forta nga personazhe të ndryshëm publikë në vend.
Së fundmi është publikuar një dokument i firmosur nga vetë ish-prefekti dhe kryebashkiaku i Tiranës në periudhën e pushtimit fashist, Qazim Mulleti.
Dokumentin e ka publikuar në “Facebook” edhe deputeti socialist Erion Braçe. Ai shkruan se fashizmi është krim. Braçe shkruan, se Qazim Mulleti ka qenë i komanduar në atë post nga fashistët e nazistët dhe është bashkëpunëtor i tyre.
“Fashizmi nuk është opinion, as teatër, as komedi! Fashizmi është krim! Urdhëroni: Kur pushkatoheshin antifashistë në Tiranë dhe prefekti kishte “nderin” të raportonte kështu! Puthini dorën tani”, shkruan Braçe, pasi publikon dokumentin.
Ndërkohë, deputetit Erion Braçes i është përgjigjur Mira Dine, mbesa e Qazim Mulletit. Dine shkruan, se ai shpëtoi hebrenj dhe se bashkëpunimi me pushtuesin ishte institucional. Ajo theksoi, se duhet që të shikohet e vërteta dhe mos të hidhen akuza.
“Me këtë postim që keni bërë shoku Braçe, tregoni se nuk keni bërë shkollë tjetër veç asaj të PPSH. A e dini ju se për postin shtetëror nuk mund të paragjykohet si bashkëpunëtor, se bashkëpunimi është brendia e detyrës së politikanit dhe ju bashkëpunoni me demokratët, por mbeteni socialist.
A e keni parë Schindlers List dhe ai bashkëpunonte për të shpëtuar jetë njerëzish, dhe para një muaji u nderua dhe një oficer gjerman nazist në Gjermani, se ka shpëtuar jetë njerëzish.
U deshën 77 vjet që oficeri nazist të nderohej, s’e paragjykoj si po bëni dhe ju në rastin e fisnikut Qazim Mulleti… Hiqini syzet e paragjykimit, shoku Braçe, dhe shikoni të vërtetën, sesa hebrenj ka shpëtuar fisniku Qazim Mulleti duke i dërguar në malësitë e Tiranës te miqtë e vet besnikë”, tha ai.
