Shtetet e Bashkuara të Amerikës kërkojnë hetim dhe dënim për ish-kryeministrin Sali Berisha. Shpallja “non grata” ishte hapi kryesor i hedhur nga amerikanët, por tashmë topi ka kaluar te drejtësia shqiptare.
I dërguari i DASH për Ballkanin Gabriel Escobar dha dje një intervistë për gazetarin Sokol Balla, ku i dërgoi një mesazh të prerë drejtësisë shqiptare që të mos vonojë me nisjen e hetimeve për Berishën.
Ai u shpreh se SHBA e bëri detyrën e saj duke shpallur të padëshiruar, por tashmë është detyra e autoriteteve shqiptare që të veprojnë. Sipas të dërguarit të DASH, emrat “non grata” duhet të ndëshkohen për krimet që kanë kryer. “Ja pyetja për ju: Ku janë hetuesit vendas dhe prokurorët vendas në raste si këto?
Dua të them, ne e bëmë sipas ligjeve tona, rregullave tona, autoriteteve tona. Por edhe ju keni disa në vend. Pra, nëse doni ta dini, hetoni. Nëse doni të dënoni, bëni ndjekje penale. Nëse doni të ndëshkoni, dënoni njerëzit që janë pjesë e këtij korrupsioni sepse kjo nuk ka të bëjë me Amerikën që lufton korrupsionin në Shqipëri, por ka të bëjë me Amerikën që mbështet luftën tuaj kundër korrupsionit. Kjo është pyetja ime”, tha ai.
Më pas ai u pyet edhe mbi mundësinë që SHBA të dorëzojë informacionet që ka kundër Berishës tek autoritet shqiptare. Escobar e paralajmëroi një gjë të tillë duke dhënë sinjale se nëse nisin hetimet, SHBA do të dorëzojë provat. “Kemi një sistem të shkëlqyer bashkëpunimi në ligjzbatim dhe bashkëpunim ligjor dhe po, mund ta bëjmë”, tha ai.
I pyetur nëse po ndodh tani shkëmbimi i informacionit ai tha: “Nuk do të komentoj për komunikimet diplomatike, por pjesë e marrëdhënies dypalëshe, e cila është e thellë dhe e gjerë, ka të bëjë me bashkëpunimin jo vetëm tek pjesa ushtarake, jo vetëm në nivelin politik, por edhe për zbatimin e ligjit dhe një gamë të gjerë çështjesh si nga pikëpamja dypalëshe ashtu edhe shumëpalëshe ku ne ndajmë interesa të përbashkëta dhe synime të përbashkëta”.
Reforma në drejtësi
I dërguar i DASH u ndal edhe te reforma në drejtësi. Ai deklaroi se SHBA do të vijojë të punojë që ky proces të ecë përpara. Ai deklaroi se sa i takon luftës ndaj korrupsionit, SHBA do të vijojë të përdorë sanksione ndaj emrave të zhytur në afera.
“Epo, shteti i së drejtës është blloku i themelit nga ku ngrihen të gjitha demokracitë, përfshirë edhe tonën. Dhe çdo vend, duke përfshirë edhe vendin tonë, duhet të kërkojë mënyra për të forcuar institucionet e tij, ato që kanë të bëjnë me sundimin e ligjit. Pra, kur vjen fjala për këtë, ne jemi duke punuar me ju përmes programeve tona të ndihmës, përmes programeve tona të shkëmbimit, përmes programeve nga më të ndryshmet, për të forcuar kapacitetet.
Megjithatë, dhe meqë ra fjala, ne do të bëjmë pjesën tonë në lidhje me sanksionet, sepse ne e marrim shumë seriozisht korrupsionin. Thënë kjo, nuk ka alternativë ndaj prokurorive vendase, gjyqësorit të pavarur, prokurorëve të pavarur dhe vullnetit politik për t’i bërë të gjitha këto të mundura”, tha ai.
Escobar e bëri të qatë se nga tani e në vijim, SHBA do të rrisë presionin ndaj qeverisë dhe autoriteteve përkatëse për të mos toleruar asnjë të korruptuar. “Pra, do të shihni presionin politik amerikan ndaj udhëheqësve të zgjedhur, të cilët ne i konsiderojmë partnerë të mirë, por ata duhet të jenë partnerë të mirë edhe për të çuar përpara sundimin e ligjit, dhe më besoni, ne jemi mjaft të vetëdijshëm dhe mjaft të hapur me ta për mangësitë që ekzistojnë. Shqipëria ka bërë shumë përparim. Do të doja të shihja më shumë dhe ne duam të punojmë me ju për të arritur më shumë. Dhe shpresojmë se do të arrijmë atje shumë shpejt”, tha ai. /Kliti Topalli
