Regjistri Kombëtar i shtetasve shqiptarë ka disa ditë, që ndodhet në një rrezik potencial. Kjo, si pasojë e një veprimi të rrezikshëm nga një prej operatorëve kibernetikë në vend. Subjekti, që prej vitit 2008 ka pasur kontratë me shtetin shqiptar për të mirëmbajtur regjistrin civil të shtetasve.
Në fakt, që prej pak kohësh, nuk është kualifikuar më në këtë rang. Për këtë shkak absurd, po i bën presion shtetit shqiptar, duke krijuar një rrezik të përmasave të rënda.
Bëhet fjalë për një kompani austriake, e cila për 10 vjet ka pasur monopolin e mirëmbajtjes së regjistrit të shtetasve shqiptarë.
Kjo kompani, e cila ka qenë në pozitat monopol, pothuajse një dekadë, nuk është kualifikuar nga ministria e Brendshme.
Këtë radhë ajo ka zhvilluar një garë të hapur, ku kanë marrë pjesë disa kompani shqiptare dhe të huaja. Në fund të garës është kualifikuar një konsorcium i përbashkët, i përbërë nga një kompani shqiptare dhe një ndërkombëtare. Me t’u marrë vesh ky përfundim, ka nisur një ofensivë e frikshme e ish-mirëmbajtësit të sistemit bazik shqiptar. Ai po i bën presion shtetit shqiptar me të gjitha mënyrat, shkruan LajmeShqip
Është përdorur njollosja mediatike ndaj operatorëve të tjerë, duke mos pasur asnjë skrupull apo etikë. Nga ana tjetër, për disa ditë me radhë, sistemi online i gjendjes civile në vend është tronditur totalisht. Bëhet fjalë për rreziqe, që e ekspozojnë regjistrin e gjendjes civile ndaj shteteve apo shërbimeve jo partnere të huaja. Madje dhe këto, prej vitesh kanë nisur një sulm, për të shtënë në dorë sekretet e shtetit shqiptar. Kjo situatë ka alarmuar shtetin, i cili thjesht ka ndërmarrë një konkurs të hapur, ku çdo subjekt, që nuk fiton ka të drejtë ankimimi në të gjitha shkallët administrative dhe gjyqësore.
Këto ditë po ndodh një fenomen i rrezikshëm i shantazhimit ndaj shtetit.
Pikërisht atëherë, kur organet kompetente të prokurorimit publik po shqyrtojnë një ankesë të operatorit, që ka pasur të drejtën e menaxhimit të sistemit të gjendjes civile. Mirëpo, edhe pse çështja është në shqyrtim, është tronditur disa herë sistemi online, që ka të dhënat personale të shqiptarëve. Në fakt është një shantazh i pastër. Në gjithë këto vite, që prej kur Regjistri i Shtetasve u informatizua, ka pasur një masakër të vërtetë të të dhënave personale. Subjekte politike, kompani private, por edhe shtete të huaja kanë arritur të sigurojnë regjistrin civil të Republikës së Shqipërisë, i cili është pjesë e Sigurisë Kombëtare.
Paradoksi i shantazhit qëndron në absurdin që sulmohet mediatikisht, fituesi i këtij konkursi! Dhe pse?! … sepse e ka fituar këtë konkurs me vlerë shumë më të vogël, sesa konkurentët e tjerë!!!
