Avokati i ish-ministrit të Brendshëm Saimir Tahiri, Maks Haxhia ka deklaruar për mediat se trupa gjykuese që dënoi Saimir Tahirin ka qenë e ndikuar dhe nën presion për ta dënuar atë me 3.4 vite burg.
Haxhia deklaroi se ka qenë një grup apo një individ që kishte ndikuar tek gjyqtarët me qëllim njollosjen e figurës së Tahirit. Ndër të tjera ai ka thënë se vendimi është marrë në momentin e fundit në dhomën e këshillimit.
“Kam kurajën ta them që ai trup gjykues ishte profesionalisht i vendosur në cilësi të larta, nuk mund të them që janë të paaftë. Atyre gjyqtarëve që e njihnin dosjen në detaje, është e pafalshme të merrnin atë vendim.
Ata lejuan të mendohet se diçka ka ndodhur në seancën e fundit në momentin që ata kanë folur në dhomën e këshillimit. Unë jam i bindur se ai trup gjykues ka qenë i ndikuar dhe në presion për të marrë këtë vendim.
Qëllimi është, nisur nga fakti se dosja e Tahirit në përbërje të saj ishte një hap i sigurt në Gjykatën e Lartë që do merrej pafajësi. Për mua segmente apo individë, ky grup që ka hyrë donte njollosjen e Tahirit dhe futja në burg e tij. Kjo i’a vështirësonte punën gjyuqtarëve, e vinte Gjykatën e Lartë para faktit se dikush është në burg dhe duhet të matemi mirë për të marrë një vendim dhe kështu grupi apo individi realizoi veçimin përfundimisht nga politika të Tahirit sepse u njollos.
Kjo bën të arrijmë në përfundimin se vendimi nuk është shprehje vullnetit të trupës së gjyqtarëve. Unë po të kem të dhëna të sakta e them që është ky grup apo ky individ”,-deklaroi avokati ndër të tjera.
