Zhvillime të reja rreth pushtimit të Ukrainës nga Rusia. Ushtria ukrainase ka thënë se rajoni Shchastya është marrë nën kontroll dhe se 50 ushtarë rusë janë vrarë.
Forcat ukrainse gjithashtu thanë se pas raportimit fillestar për pesë aeroplanë rus të shkatërruar, është shkatërruar edhe aeroplani i gjashtë rus në rajonin Kramatorsk.
Sipas Komandës së Përbashkët të Forcave, rreth 50 pushtues rusë janë vrarë sot në zonën Shchastya, shkruan India Today.
Ndërsa mësohet se shtatë persona janë vrarë, nëntë të tjerë janë plagosur nga bombardimet ruse, thanë autoritetet ukrainase të enjten.
Presidenti i Ukrainës, Volodymyr Zelenskiy, tha të enjten se u kishte bërë thirrje liderëve botërorë që të vendosin të gjitha sanksionet e mundshme ndaj Rusisë.
“Të dashur qytetarë ukrainas, sot në mëngjes presidenti (Vladimir) Putin njoftoi një operacion special ushtarak në Donbas. Rusia kreu sulme në infrastrukturën tonë ushtarake dhe rojet tona kufitare.
Në shumë qytete të Ukrainës u dëgjuan shpërthime. Ne po vendosim gjendjen ushtarake në të gjithë territorin e vendit tonë.
Një minutë më parë pata një bisedë me presidentin (Joe) Biden. Shtetet e Bashkuara tashmë kanë filluar të bashkojnë mbështetjen ndërkombëtare. Sot secili prej jush duhet të ruajë qetësinë.
Qëndroni në shtëpi nëse mundeni. Ne jemi duke punuar. Ushtria po punon. I gjithë sektori i mbrojtjes dhe sigurisë është duke punuar”, ka thënë ai.
“Asnjë panik. Ne jemi të fortë. Ne jemi gati për gjithçka. Ne do të fitojmë mbi të gjithë, sepse ne jemi Ukraina”, ka shtuar më tej Zelensky.
