Presidenti ukrainas, Volodymyr Zelensky ka lëshuar një thirrje për qytetarët e Rusisë, që të vazhdojnë protestat e tyre për të “kapërcyer të keqen”.
Në një fjalim të fortë, gati në lot, Zelensky tha se kjo nuk është një luftë vetëm për lirinë e një populli, por është dhe për lirinë e vetë rusëve.
“Kolegët dhe të afërmit tuaj duhet të jenë në gjendje t’ju dëgjojnë. Ne jemi ukrainas dhe duam paqe. Shtetas rusë. Kjo është lufta jo vetëm për paqen në Ukrainë. Kjo është lufta për lirinë tuaj për jetën tuaj. Nëse heshtni tani, atëherë në të ardhmen vetëm varfëria juaj do të flasë në emrin tuaj. Mos hesht.”- deklaroi Zelensky.
Presidenti theksoi gjithashtu se nga provat e grumbulluara nga ushtarët rus të zënë rob, rezulton që pushtimi i Ukrainës ka qenë i planifikuar me kohë.
“Ata që u kapën, qindra ushtarë dhe pilotë rusë që hidhnin bomba në qytetet tona, na treguan provat, pamë dokumente, prova si harta. Kjo nuk është një luftë e improvizuar. Është e qëllimshme,e paracaktuar. Ata e planifikuan këtë luftë shumë më parë.”- tha ai.
Presidenti rus, ndërkohë, ka thënë se sulmi do të ndalet vetëm nëse Ukraina dorëzohet dhe kërkesat e Moskës do të përmbushen.
Sipas Kremlinit, Putini i tha presidentit turk Tajip Erdogan në një telefonatë të dielën se Rusia do të ndalonte operacionin e saj ushtarak vetëm nëse Ukraina ndalonte luftimet dhe kërkesat e Moskës do të përmbusheshin.
Rusia është përfshirë nga nja valë e gjerë protestash që kur Putin urdhëroi sulmet ndaj Ukrainës, me popullin që e kundërshton këtë lëvizje dhe kërkon largimin e presidentit rus nga pozita e tij.
