Ministrja Olta Xhaçka dhe Sali Berisha janë përplasur në sallën e Kuvendit, teksa ajo i kujtoi shpalljen non-grata nga SHBA. Xhaçka shtoi se një politikan që i ka duart e lyera me gjak, duke iu referuar vrasjeve të 21 janarit, nuk duhet të jetë sot në Kuvend.
“E kaluara e hidhur, shëmbëlltyra e vdekjes së hidhur se vulën ua ka vënë aleati më i madh, SHBA, që e keni shkruar vetë me duart e përgjakura. Një politikan i tillë nuk duhet të ishe këtu dhe nuk se çfarë përfaqëson”, tha Xhaçka.
Ndërsa Berisha e akuzoi se kur ka qenë ministre e Mbrojtjes ka plaçkitur pronat e ushtarëve.
“Mund ti them zonjës se në historinë e Ministrisë së Mbrojtjes nuk ka patur njeri më plaçkitës ndaj pronave të ushtrisë sesa parafolësja. Olta kur flet duhet të matesh dy herë se e ke filluar me piramidat dhe e mbylle me plaçkitjet e pronave të ushtrisë”, tha Berisha.
Ai e akuzoi edhe për të shoqin.
Ministrja për Evropën dhe Punët e Jashtme, Olta Xhaçka, iu kundërpërgjigj menjëherë akuzave të Sali Berishës, për bashkëshortin e saj.
Xhaçka theksoi se bashkëshorti i saj po investon në pronën e tij private dhe se nuk ka përfituar asnjë pronë të shtetit.
“Berisha mashtrues! Bashkëshorti im s’ka përfituar asnjë cm2 tokë nga ky shtet. Dhe si për çdo biznesmen që punon me djersë e riskon në këtë vend, unë jam krenare për burrin tim, po gruaja juaj, është krenare për ju?
Berisha, je shëmbëlltyrë e vdekjes politike që i ulërin dëshpërimi i vulës së fatit të vet. Fatin e ke shkruar vetë me duart e përgjakura të pushtetit tënd politik. Vulën ta ka vënë aleati ynë strategjik”, u shpreh ministrja Xhaçka.
Gjatë fjalës së saj, ministrja Xhaçka vlerësoi rezultatet e Këshillimit Kombëtar, duke theksuar se 59% e shqiptarëve mbështesin nismën e Ballkanit të Hapur.
“Ka dy arsye kryesore përse ne po punojmë kaq fort për Ballkanin e Hapur. Në njërën anë, sepse kjo nismë është një mekanizëm që zbaton e bën më efikase proceset e parashikuara në Procesin e Berlinit duke ju dhënë atyre pronësi lokale.
Së dyti, dimensioni strategjik i kësaj nisme e cila në fakt, ashtu si Procesi i Berlinit, ngrihet mbi filozofinë që zgjidhja e problemeve që ka ende sot rajoni, kalon nga bashkëpunimi e integrimi”, tha ministrja Xhaçka.
