Gjenerali i Forcave Ajrore të SHBA dhe njëherazi kreu i Komandës Amerikane në Europiane, Tod Wolters u ndje i privilegjuar me dekoratën “Ylli i Madh i Mirënjohjes Publike” që iu dha nga kryeministri Edi Rama.
Në fjalën e tij përshëndetëse para se të mbyllë misionin në kontinentin e vjetër, ushtaraku madhor amerikan tregoi se nuk është kurrë kaq i mallëngjyer. Ai vlerësoi progresin e Shqipërisë që prej vitit 2016 kur vizitoi vendin tonë. Wolters e konsideroi Shqipërinë vëllain e madh të SHBA në Ballkan. “Kurrë në jetën time të shkurtër në planetin tonë, s’kam qenë kaq i mallëngjyer. Kjo nënkupton shumë për mua. Dua ta nis duke folur për kombin tuaj se si rritet ditë pas dite.
Shqipëria është vëllai i madh në rajonin tonë të NATO-së. Ajo që kam parë që prej 2016 është rritja. Shqipëria nën udhëheqjen tuaj është rritur jashtëzakonisht shumë. Do doja të flisja prej disa prej elementëve që e bëjnë kaq të çmueshme mbajtjen e këtyre uniformave”, u shpreh fillimisht gjenerali amerikan. Më tej, ai vlerësoi me superlativa shefin e qeverisë shqiptare Edi Rama për drejtimin politik të Shqipërisë në 3 mandatet e fundit.
Ai e çmoi Ramën si njeri që frymëzon dhe ngjall respekt te kushdo që takohet me të. Wolters e çmoi si privilegj takimin dhe komunikimin me të. “Ju kryeministër në këto 61 vite të shkurtra të jetës sime je mishërimi më i madh i kësaj udhëheqje. Ka shumë karakteristika unike tuajat.
Ju mund të hyni në një sallë të madhe liderësh, presidentësh e kryeministrash dhe brenda sekondit të gjithë kupton se ka një qenie të veçantë që mishëron frymëzimin dhe trajton të tjerët me respekt. Unë vlerësoj shumë këtë frymëzimin. Për ne ka qenë privilegj i veçantë që të ndajmë kohë me ju”, përfundoi fjalën përshëndetëse shefi i Komandës Amerikane në Europë, Tod Wolters.
