Kryetari i grupit parlamentar të PS-së, Taulant Balla ka folur për mediat jashtë Kuvendit, duke iu përgjigjur akuzave të Berishës se Meta ka shkelur Kushtetutën pasi ka firmosur një dekret jashtë vendit.
Sipas Ballës, dekreti nga kreu i shtetit është firmosur në konsullatën shqiptare në Turqi, që konsiderohet tokë shqiptare.
“Kushtetuta është shumë e qartë, raporti i Komisionit të Ligjeve e ka sqaruar. Fantazmat kanë problem me gjeografinë. Të thuash që kjo çështje, që konsullata shqiptare në Stamboll nuk është tokë shqiptare, por është turke, është njësoj sikur ka thënë dikur që deti i Shqipërisë është i Greqisë, apo gjykatën e Parisit që e ka bërë gjykatë amerikane se nuk shkon dot vetë në Amerikë”, tha Balla.
Sipas tij “Procesi është tërësisht kushtetues. Kuvendi i Shqipërisë sot ka pritur me seriozitet gjithë procedurën e nisur nga Ministria e Mbrojtjes, Kryeministri dhe Presidenti. Nëse Berisha është i kënaqur nga Meta dhe do të çojë Metën në Kushtetuese, ta provojë”.
