Robert Lewandowski, me numrin 12 në shpinë, duke pritur që numri 9 t’i lirohet në rast se Memphis Depay largohet nga Barça këtë verë, bëri debutimin e tij me ngjyrat blaugrana, në miqësoren amerikane kundër Real Madridit.
Luajti vetëm 45 minuta, nuk shënoi, por ishte shumë afër golit. Thibaut Courtois devijoi një goditje të tij. Ansu Fati mori një qortim të vogël nga polaku, sepse nuk i pasoi topin në zonë, që mund të përfundonte në gol. Nuk shkoi më tej. Të dy u përqafuan më vonë, të lumtur që luanin së bashku për herë të parë.
Në fund të fitores kundër “Los Blancos” në Las Vegas, Lewandowski shprehu shprehu në “Barça TV” përjetimin e tij: “Jam shumë i lumtur. Edhe pse ishte miqësore, “El Clasico” është “El Clasico”, gjithmonë ndryshe dhe e veçantë. Jemi shumë të kënaqur me cilësinë dhe intensitetin që kemi treguar”.
Polaku ka gjetur një familje te Barça, që e ka pritur mrekullisht. “Ne po i presim me padurim ndeshjen e ardhshme, seancën e ardhshme stërvitore, sepse mendojmë se diçka e mirë nuk ka ardhur ende.
Jam shumë i lumtur që ndodhem këtu, pjesë e kësaj skuadre. Nuk ndihem sikur kam vetëm disa ditë me skuadrën, ndjesia është sikur kam muaj të tërë te Barcelona. Ndihem shumë i mbështetur si nga shokët e skuadrës, ashtu edhe nga stafi”.
Duke u rikthyer te rezultati pozitiv ndaj Real Madridit, ‘Lewy’ festoi fitoren ndaj kampionit aktual të Evropës: “Ne gjithmonë mendojmë për të fituar. Kemi një mentalitet shumë fitues, jo vetëm në ndeshje, por edhe në stërvitje. Kemi mundësinë të shohim përpara dhe të mendojmë se ky mund të jetë një sezon i mrekullueshëm”.
