Ministria e Drejtësisë ka nisur përgatitjen e Strategjisë Ndërsektoriale Kundër Korrupsionit, 2023-2030, e cila duket se do të ketë orientim prioritar nga financimet e subjekteve politike, por edhe lobimet.
Në dokumentin konceptual strategjik të zbardhur nga Scan Televizion, theksohet se lobimi mund të çojë gjithashtu në ndikim të padrejtë, konkurrencë të pandershme në dëm të interesit publik dhe politikave publike efektive.Përvoja ndërkombëtare sugjeron që rregullimi efektiv i lobimit varet nga elementët e mëposhtëm, thekson Ministria e Drejtësisë: Përkufizimi i qartë i aktiviteteve lobuese.
Publikimi i kritereve dhe informacionit përkatës mbi aspektet kyçe të lobimit si objektivi, përfituesit, burimet e financimit dhe objektivat. Shkak për të cilin, duket se së shpejti në Shqipëri do të kemi një strukturë institucionale që do mbikëqyrë lobimet.
“Kërkesat në rritje për transparencë në vendimmarrjen publike kanë bërë që Shqipëria të përfshijë si prioritet gjithnjë e më shumë lobimin me synim përcaktimin e një kuadri ligjor, ngritjen e një strukture institucionale dhe një mekanizmi për kontrollin e lobimit, thekson dokumenti i Ministrisë së Drejtësisë.
Ndërkohë që element edhe më prioritar duket se do të jetë transparenca e financave dhe fondeve të partive politike.Sipas dikasterit, një numër në rritje vendesh kanë zhvilluar sisteme që lejojnë partitë politike dhe kandidatët të paraqesin në mënyrë dixhitale raportet e tyre të të ardhurave dhe shpenzimeve.
Struktura e mbikëqyrjes së financave politike që merr këto të dhëna i analizon ato për pajtueshmërinë me rregulloret e raportimit përpara se t’i ngarkojë në një faqe interneti të aksesueshme nga publiku, përcakton dokumenti i Ministrisë së Drejtësisë.
