Deri më tani kemi parë shkolla pa licenca, universitete të paakredituara, kopshte të pa kontrolluara, por çudia më e madhe që po ndodh së fundmi, janë “akademitë” e krijuara nga instagrami.
E tillë është edhe Accademia Medicina Estetica, në faqe instagrami e regjistruar si “accademia_estetic” që mashtron mjekët shqiptarë duke u ofruar certifikata për aplikimin e botoksit, të panjohura dhe të palicencuara nga instancat shtetërore.
Kjo “akademi” instagrami, pa zyra e pa adresë, e menaxhuar nga Ada Shanaj, juriste në Ministrinë e Jashtme, që hiqet si mjeke, që blen dhe përdor pa autorizim materiale mjekësore duke vënë në rrezik jetën e pacientëve, nuk ka asnjë licencë të autorizuar nga instancat shtetërore për lëshimin e certifikatave në aplikimin e botoksit, fillerave, apo ndërhyrjeve të tjera kirurgjikale.
Mjekët italianë që Ada Shanaj rekruton nëpër biseda kafenesh, i zhvillojnë këto trajnime në salla hotelesh, të pa kontrolluar për kushtet e sterilitetit apo sigurisë, duke vënë në rrezik jetët e atyre që u nënështrohen procedurave.
Akoma dhe më keq, ata që pajisen me certifikata për kryerjen e procedurave mjekësore janë edhe parukierë, estetistë vetullash dhe thonjsh.
Kush i kontrollon këta mjekë italianë që vijnë në Shqipëri dhe firmosin e japin certifikata vetëm me dy orë trajnim, duke u dhënë mundësinë parukiereve, estetisteve, mjekëve, të marrin në qafë klientët në aplikimin e ndërhyrjeve mjekësore estetike?
A paguajnë taksa këta trajnues?
Kush i njeh këto certifikata instagrami, si lëshohen këto certifikata pa asnjë licencë, akreditim apo kualifikim nga instancat shtetërore, duke filluar që nga Ministria e Shëndetësisë e deri tek Ministria e Arsimit?
Në QKB biznesi nuk ka asnjë licencë aktive, pra, të gjitha veprimtaritë e tij janë në shkelje të plotë me legjislacionin në fuqi, duke vendosur në rrezik jetën e atyre që bien pre e mashtrimeve për të kryer ndërhyrje të tilla. / Infront
