Qeveria ka vendosur që të dëmshpërblejë të përndjekurit nga sistemi komunist. Këtë e ka bërë të ditur, ministri i Drejtësisë Ulsi Manja. Gjatë fjalës së tij, ministri i Drejtësisë, Ulsi Manja është shprehur dje pas mbledhjes së qeverisë, se një nga aktet e miratuara në mbledhjen e djeshme është dëmshpërblimi për 54 subjekte të cilët i përkasin shtresës së ish të përndjekurve politikë.“Vendosëm për dëmshpërblimin e ish- të dënuarve nga sistemi komunist, kjo për 54 subjekte.
Subjektet e vendimit tonë janë jo vetëm për ata që e kanë vuajtur vetë, por dhe familjarët e tyre. Masa e dëmshpërblimit do të paguhet në këste. Kjo masë as nuk i zhbën e as nuk i kthen vuajtjet, por është masë e domosdoshme në aspektin ligjor dhe moral, pasi tregon mbështetjen e qeverisë për këtë kategori të shumëvuajtur. Është vendi mi i 29-të që kemi kaluar gjatë qeverisjes tonë, do të ketë edhe vendime të tjera”, tha Manja. Sa i përket, amnistisë penale, ministri bëri me dije se janë në fazë diskutimesh për amnisti penale. Ndër të tjera, ministri i Drejtësisë, Ulsi Manja pas mbledhjes së Këshillit të Ministrave tha se ende nuk ka një vendim, por po diskutohet me Drejtorinë e Burgjeve.
“Amnistia Penale është traditë e çdo fundviti që merr qeveria dhe i përket vitit 2020. Ne si ministri e drejtësisë me Drejtorinë e Burgjeve jemi në fazën e studimit dhe në momentin që kemi një studim dhe analizë do të bëjmë me dije opinionit publik. Po punojmë për të pasur amnistinë penale por jemi në fazën e studimit dhe analizës”, tha Manja.
Qeveria çon në Kuvend pr/ligjin për shërbimin përmbarimor shtetëror
Ndërkohë, Qeveria miratoi pr/ligjin për organizimin dhe funksionimin e shërbimit përmbarimor gjyqësor shtetëror. Në mbledhjen e ditës së djeshme janë miratuar 2 akte që vijnë si propozim i Ministrisë së Drejtësisë. Akti i parë është ai i dëmshpërblimit financiar për 54 ish-të përndjekurit politik, të cilët do të marrin masën me këste. Akti i dytë është projektligji për shërbimin përmbarimor shtetëror.
Manja tha se do t’i japë zgjidhje problematikave që janë hasur me këtë shërbim.“Ka për qëllim të rregullojë dhe garantojë mirëfunksionimin e shërbimit përmbarimor shtetëror duke i dhënë zgjidhje problematikave që janë hasur në këtë shërbim. Reformimi i sistemit përmbarimor shtetëror bëhet i domosdoshëm pasi ky shërbim funksionin me ligjin e miratuar të vitit 2001 dhe nuk garanton cilësi të shërbimit.
Me pr/ligjin që kaluam në Kuvend, shërbimi përmbarimor gjyqësor shtetëror do të konkurrojë denjësisht shërbimin përmbarimor privat”, tha ministri i Drejtësisë Ulsi Manja në një prononcim për median pas mbledhjes së Këshillit të Ministrave. Gjithashtu, mësohet se qeveria ka bërë gati dhe paketën e akteve nënligjore për funksionimin e këtij shërbimi.
