Britania e Madhe ka propozuar një plan me 10 pika për t’i dhënë fund ‘Hotel Britanisë’. Plani është propozuar nga ministri britanik i emigracionit Robert Jenrick dhe pritet të shqyrtohet nga qeveria për të ndalur krizën e emigrantëve të paligjshëm në vend
Jenrick tha për “The Telegraph” se taksapaguesve britanikë u duhet të paguajnë deri në 6 milionë paund në ditë vetëm për të strehuar këta emigrantë, të cilët shpesh dërgohen në hotele luksoze me dhoma që i kalojnë 200 paund vetëm sepse numri i ardhjeve është i lartë dhe nuk mund të përballohet nga kampet e strehimit.
Pjesë e këtij plani sipas ministrit të emigracionit pritet të jenë edhe shqiptarët. Sipas tij, atyre mund t’i hiqet tërësisht e drejta e aplikimit për azil duke u trajtuar kështu si qytetarë të vendeve të BE-së, pasi Shqipëria konsiderohet një vend i sigurt, jo një vend i prekur nga lufta apo konflikti.
Nga ana tjetër, pjesë e planit do të jetë edhe një ndryshim i ligjit të ‘skllavërisë moderne’ të cilin sipas sekretares së brendshme britanike Suella Braverman, shqiptarët kanë nisur ta abuzojnë duke deklaruar se janë viktima të trafikimit që sillen në Angli jashtë dëshirës së tyre. Edhe pse nuk u dha asnjë detaj tjetër, mbetet për t’u parë nëse shqiptarët do të përfitojnë nga ky trajtim si qytetarët e tjerë të BE-së, për ta ardhur ligjërisht në Britani me anë të vizave të punës.
Rreth 41 mijë emigrantë të paligjshëm mbërrijnë çdo vit në Britani me anë të Kanalit La Mansh, 1/4 e të cilëve janë burra dhe djem shqiptarë.
