Zv/presidenti i FSHF-së, Arben Dervishaj, i arrestuar dje me urdhër të SPAK-ut për dëm ekonomik 4 milionë euro për faturat fiktive të punimeve në inceneratorin e Fierit, u përmend në shkurt të këtij viti dhe nga kryebashkiaku i Tiranës, Erion Veliaj.
Gjatë kohës kur po zhvillonte punimet Komisioni Hetimor Parlamentar për Inceneratorët, Veliaj u thirr për të dëshmuar në 23 shkurt të këtij viti. Ai u kërkoi anëtarëve të komisionit të thërrisnin për të dëshmuar Arben Dervishajn në cilësinë e supervizorit të inceneratorëve.
Veliaj e akuzoi zyrtarin e lartë të FSHF se paguhej shumë për ekspertizën e mbikëqyrjes së punimeve të djegësve.
Ai akuzoi Partinë Demokratike se nuk po e thirrte qëllimisht Dervishajn në komision për të mbrojtur shefin e tij, presidentin e FSHF Armand Duka, i cili atë kohë u sulmua nga kryebashkiaku Veliaj për korrupsion dhe abuzim me detyrën në krye të futbollit shqiptar.
Kujtojmë që në atë periudhë pati kontestime të ashpra për zgjedhjet në shoqatat e futbollit, Komitetin Ekzekutiv të FSHF dhe zgjedhjen e kreut të ri të federatës. Me gjithë presionet e Veliajt dhe qeverisë, Duka ia doli të siguronte mandatin e gjashtë në krye të FSHF. “Tani që gara e FSHF-së është pezulluar, ka kohë të përgjigjet për dherat për bulonat për taksat.
Pra, është supervizori, nuk jam unë tekniku i lavatriçes. Ka një supervizor që paguhet jo pak për të bërë këtë punë. Supervizori Arben Dervishi paguhet sa frëngu pulën që të merret me këtë punë, me çdo dado e vidë. Ftojeni i lirë është s’ka më zgjedhje për të vjedhur në Gjirokastër se mbaroi puna e FSHF-së.
Ftojeni të vijë tani që është i lirë të japi llogari ku shkojnë lekët e supervizorit? A d.m.th., ti që qenke i Dukës e të mbron partia, po ta shkelim syrin? Të gjithë të tjerët do vijnë? Do vijë vetëm Erioni?”, shprehej Veliaj ndaj Arben Dervishajt.
