Në një vizitë të veçantë në Mirditë, emisioni “Opinion”, në Tv Klan është ndalur në vendet më kryesore e më me histori të kësaj zone. Një prej tyre ishte edhe vendi ku mblidheshin dikur për të diskutuar burrat e 12 bajraqeve të Mirditës.
Në këtë vend me 12 lisa ku çdo lis personifikonte një bajrak, Dom Gjergj Meta rrëfeu edhe një histori të veçantë se si u ndaluan martesat midis tre bajraqeve të Oroshit, Spaçit dhe Kuzhnenit.
Dom Gjergj Meta: Këtu janë lisat e Marpepës, këtu kanë qenë 12 lisa, për 12 bajrakët e Mirditës. burrat mblidheshin këtu…
Blendi Fevziu: Ky ishte vendi ku mblidheshin për kuvendim?
Dom Gjergj Meta: Po për kuvendim. Thonë së janë mbledhur tre bajraket e Mirditës, Oroshi, Spaçi dhe Kuzhneni për të vendosur a mund të martohemi me njëri-tjetrin?
Blendi Fevziu: A, pse nuk lejoheshin martesat midis bajraqeve?
Dom Gjergj Meta: Po. Dhe këtu rastësisht kaloi një grua me emrin Mara e Pepës dhe u thotë “tungjatjeta oj vëllazën”, ata siç ishin ndaluan, “ajo na quajti vëllazën, mbaroi Kuvendi”, nuk mund të martoheshin.
Blendi Fevziu: Nuk mund të martoheshin nga që i tha vëllezër.
Dom Gjergj Meta: Po. Fatkeqësia ka qenë që Rruga e Kombit e prishi këtë monument. Kemi lisat e rrëzuar këtu…
Blendi Fevziu: Nuk dihet se cili bajrak është rrëzuar këtu./tvklan.al
