Nisin përplasjet e para mes Sali Berishës dhe Ilir Metës për zgjedhjet vendore. Kreu i PL mbështeti primaret dhe pranoi të gjithë kandidatët e Berishës, por duket se Bardh Spahia i Shkodrës nuk hyn në listën e të preferuarve.
Ilir Meta e ka sulmuar hapur sot Bardh Spahinë, duke deklaruar deri diku se ai është treguar mosmirënjohës. Sipas Metës, LSI e ndihmoi që të shpallej fitues, por ai i mori për vete meritat.
“Ka pasur përkrahje nga Partia e Lirisë, ka pretendime nga pala tjetër se nuk ka pasur, ka pasur edhe disa probleme me kryetarin e ri të Shkodrën, në drejtim me respektimin e kontributeve të tij”, tha Meta në “Real Story”.
Sipas informacioneve krisjet kanë nisur për shkak të punësimeve. Bardh Spahia nuk ka pranuar të fusë në bashki njerëzit e Metës dhe kanë nisur tensionet.
Ndërkohë, Meta u pyet dhe për marrëdhëniet me Sali Berishën, ku ndryshe nga herët e tjera që shprehej se doktori është si Kristiano Ronaldo, sot deklaroi se ata janë bashkuar për të mirën e opozitës.
“Mendoj se është një marrëdhënie që vjen nga domosdoshmëria e bashkimit të të gjitha forcave, pavarësisht nga e kaluara secili prej nesh, për çështjen më të madhe, ekzistencën e kombit tonë. Kërcënohet jo vetëm nga shpopullimi, por shpërbërja”, tha ai.
Nuk duhet harruar se javën e parë Meta shkoi në selinë e PD dhe nuk u prit nga Berisha, por nga Flamur Noka. Foltorja tha se Berisha ishte me grip, por dje ai u shfaq në seli dhe dukej në gjendje shumë të mirë. Pra duket sikur raportet mes dyshes opozitare kanë nisur të ftohen.
