Në konferencën e përbashkët për shtyp, me kryeministrin e Malit të i Dritan Abazoviç, kryeministri Edi Rama nuk i ka kursyer ironitë në lidhje me homologun e tij Albin Kurti.
Ndërsa po flitej për “Ballkanin e Hapur”, Rama u shpreh se askush nuk duhet të kërkojë në këtë projekt një “dorë të fshehtë”. Ai shtoi se nuk duhet kërkuar pas kësaj nisme, as një dorë kineze e as ruse.
Deklarata e Ramës erdhi në një ditë që në Bruksel u mbajt sot takimi mes kryeministrit Kurti dhe presidentit Aleksandër Vuçiç në kuadër të dialogut dhe propozimit europian mbi normalizmin e marrëdhënieve mes dy shteteve.
Pjesë nga konferenca:
Ju thatë që do mbahet Samiti i Ballkanit të Hapur në Mal të Zi dhe a do të thotë kjo që do të anëtarësohet Mali Zi në këtë iniciativë?
Rama: Kryeministri ka shprehur dëshirën për ta bërë këtë dhe u mundova të them dy herë, po e them edhe për herë të tretë mos kërkoni asnjë lloj dore të fshehtë në nismën e Ballkanit të Hapur. Mos shihni pas Ballkanit të Hapur as kinezë, as ruse, as gjermanë. Është nismë e jona për të jetësuar dhe zbatuar parimet dhe objektivat e procesit të Berlinit.
Kur ishim në Berlin në Samitin e Berlinit që ne e vlerësojnë shumë këtë proces, Shqipëria, Serbia dhe Maqedonia e Veriut rifirmosën gjërat që kishin firmosur më parë. Nuk pashë asnjë marrëveshje që ne nuk e kishim firmosur më parë në Ballkanin e Hapur. Nuk di asnjë marrëveshje në Ballkanin e Hapur që nuk është në kornizën e Procesit të Berlinit. Është thjeshtë kalimi nga një ditë kur vjen Kancelari dhe gjithë të tjerët dhe bëhet një diskutim mbi ku jemi dhe ku duam të shkojmë, te të gjitha ditët e tjera kur do shkojmë ne atje për të jetësuar gjërat që vendosim.
Bëjini vetes vetëm një pyetje: pse deri kur nisi Ballkani i Hapur nuk ishte realizuar asnjë marrëveshje, zero i themi ne nga anët tona. Sepse për këtë është Ballkani i Hapur. Kush do të shohë në këtë proces kinezë, ruse dhe marsianë, është i lirë ti shohë, nuk ka asnjë problem. Ndërkohë që Ballkani i Hapur është një rrugë që i bën më të lehta edhe ato situata ku vjen dita që të thonë “pa kushte, pa diskutime, hajde dhe firmos se ndryshe je jashtë”. Këtë e kam pyetje retorike, por nuk e kam përgjigjen.
