Komisioni i Ankesave dhe Sanksioneve rrëzoi sot KQZ-në dhe regjistroi Partinë Demokratike të Enkelejd Alibeajt në zgjedhjet vendore të 14 majit.
Pas këtij vendimi duket se edhe KQZ ka “ndryshuar” qëndrim duke pranuar vendimmarrjen e KAS. Në një njoftim për mediat, KQZ kërkon plotësimin e dy dokumentacioneve nga ana e Enkelejd Alibeajt.
Një prej tyre është edhe deklarata solemne, që deri më tani ishte bërë edhe “ngërçi” që nuk lejonte regjistrimin e PD-së.
Sipas njoftimit, deklarata e angazhimit solemn mund të firmoset edhe nga vetë Enkelejd Alibeaj në cilësinë e kryetarit të komanduar të PD-së.
Deri në vendimin e sotëm, kryekomisioneri Celibashi shprehej se një deklaratë e tillë, sipas ligjit mund të firmosej vetëm nga ana e Lulzim Bashës, i cili figuron si kryetar i PD-së në regjistrin e partive politike.
Për shkak të këtij arsyetimi, Celibashi vendosi dy herë që të mos pranojë kërkesën e PD-së së Alibeajt për t’u regjistruar në zgjedhje. Por ditën e sotme, KAS e hodhi poshtë vendimin e KQZ-së dhe pranoi kërkesën e Alibeajt.
Njoftimi i KQZ-së:
KAS vendos të regjistrojë subjektin zgjedhor “Partia Demokratike” me kryetar nënkryetarin, z. Enkelejd Alibeaj, në cilësinë e kryetarit të komanduar të Partisë
Komisioni i Ankimimeve dhe Sanksioneve shqyrtoi dy kërkesat ankimore të depozituara në Komisionin Qendror të Zgjedhjeve:
1.Kërkesa ankimore nr. 32 e depozituar nga Partia Demokratike e Shqipërisë me objekt “Shfuqizimi i vendimit nr. 172, datë 14.03.2023 të Komisionerit Shtetëror të Zgjedhjeve “Për shqyrtimin e kërkesës së “Partia Demokratike”, për regjistrimin si subject zgjedhor për zgjedhjet për organet e qeverisjes vendore të datës 14.05.2023” dhe regjistrimin si subjekt zgjedhor të Partisë Demokratike të Shqipërisë sipas kërkesës nr. 27, datë 05.03.2023 dhe dokumentacionit shoqërues të saj dhe të protokolluar në KQZ në datën 06.03.2023 me nr. 1337, të paraqitur në emër të PD nga përfaqësuesi z. Indrit Sefa;
2.Kërkesa ankimore nr. 33 e depozituar nga Partia Demokratike e Shqipërisë me objekt “Kundërshtimin e vendimit të Komisionerit Shtetëror të Zgjedhjeve nr. 172, datë 14.03.2023 dhe ndryshimin e vendimit duke vendosur regjistrimin e Partisë Demokratike të Shqipërisë përfaqësuar nga kryetari Sali Berisha, si subjekt zgjedhor në zgjedhjet për organet e qeverisjes vendore të datës 14 maj 2023”.
Në përfundim të shqyrtimit, KAS me shumicë votash vendosi rrëzimin e kërkesës ankimore nr. 33 të ankuesit “Partia Demokratike”, përfaqësuar në seancë nga z. Ledio Nuraj dhe z. Franci Nuri.
KAS me shumicë votash vendosi pranimin e pjesshëm të kërkesës ankimore nr. 32 të ankuesit “Partia Demokratike”, përfaqësuar në seancë nga z. Indrit Sefa dhe detyrimin e partisë “Partia Demokratike”, të depozitojë në KQZ dokumentacionin shtesë si më poshtë vijon:
1.Deklaratën sipas shkronjes “b” te pikës 2 te nenit 64 të Kodit Zgjedhor me të dhënat për nënkryetarin z. Enkelejd Alibeaj, në cilèsinë e kryetarit të komanduar të Partisë;
2.“Deklaratën e angazhimit solemn” të nënshkruar nga nënkryetari z. Enkelejd Alibeaj, në cilësinë e kryetarit të komanduar të Partisë;
si edhe ndryshimin e vendimit të Komisionerit Shtetëror të Zgjedhjeve dhe detyrimin e Komisionerit të regjistrojë subjektin zgjedhor “Partia Demokratike” me kryetar nënkryetarin, z. Enkelejd Alibeaj, në cilësinë e kryetarit të komanduar të Partisë.
