Prej 8 muajsh nën drejtimin e këtij “skuthi”, policia i ka lënë vendin eksponentëve të botës së krimit e vrasësve me pagesë…
Të hënën një vajzë vetë-shpëtoi nga peng marrja dhe dhunimi barbar prej 7 ditësh. Të martën u vra një 20-vjeçar me thikë, u plagosën po me thika e armë 6 persona të tjerë në 4 përleshje, ndërsa ditën e mërkurë, në mes të ditës, i veshur me uniformë policie u vra me atentat një person, pa përmendur aksidentet rrugore çdo 2-3 orë.
Policia tamam si shërbim komunal, pas çdo krimi e aksidenti mbledh viktima, të plagosur, thika, armë, gëzhoja, maska e makina të djegura kur u mbaron tymi dhe i merr e i fut në komisariate.
Për 3 ditë, aq sa zgjat çudia më e madhe, policia ngre postblloqe me transmetim live në media, shoqëron persona pa lidhje nga ata që i ka të skeduar në regjistra, lexon komunikata, plotëson evidenca dhe përsërit refrenin: – “Po punojmë për zbulimin e autorëve”.
Me inekzistencën dhe inkriminimin e saj, policia është bërë aq qesharake, sa 1 orë para vrasjes në Shëngjin, ministri Çuçi e drejtori Rrumbullaku në takim me drejtuesit e policive të BE, thanë se Shqipëria ka arritje kundër krimit dhe në sigurinë e plotë publike.
E vërteta është e kundërta, mbasi situata kriminale në Shqipëri, ka arritur deri në atë pikë, sa jo vetëm nuk ka ditë e natë pa 1 ngjarje në mes të sheshit, por ka ditë nga me 2-3 krime e viktima.
Nuk themi që në çdo pallat e lokal të vihet nga 1 polic, por është mos kryerje detyre, fakti që policia me 15 mijë forca, të mos mbajë nën mbikëqyrje 200 kriminelë të skeduar, siç ishte rasti i Dan Hutrës, i kriminelëve të Elbasanit, Niklës, Shkodrës, Lezhës e së fundi edhe rasti në Shëngjin.
Duket sikur policia i ka lënë vendin eksponentëve të botës së krimit e vrasëve me pagesë, të cilët kanë aq guxim e terren të lirë, sa në mes të ditës, krekosen e bëjnë atentate të veshur edhe si shefa policie me grada Komisar, Krye komisar e Drejtues Madhor.
Nuk mund të përcaktojmë, nëse drejtori Muhamet Rrumbullaku është “dru” profesionalisht; i kapur nga grupet krimit që i kanë lidhjet në politikë e biznese; ose është konformist me vartësit e tij në zona dhe nuk i shtron dot në punë e nuk i largon, apo ndoshta nuk do të punojë vetë.
Por gjersa krimi lihet i lirë e nuk goditet, patjetër që në dështimin e tij është një nga arsyet e mësipërme; dhe cilado qoftë, Muhamet Rrumbullaku duhet të dorëzojë çelësat e të shkojë t’i bjerë çiftelisë nëpër mejhane, si atëherë kur bënte aheng me vrasës komisarësh policie.
Sepse është e papranueshme, që pas emërimit me bujë të Muhamet Rrumbullakut në krye të Policisë së Shtetit dhe betimet e tij për ndryshime brenda 100 ditësh; prej 8 muajsh si me telekomandë, janë rikthyer fuqishëm, masivisht e publikisht krimet e tipit mafioz nga të gjitha grup moshat, madje edhe me autorë punonjës policie.
Jo se ish-drejtori Gledis Nano ishte në parametrat dhe pritshmëritë e premtuara kur nisi detyrën, por në raport me 11 muajt e drejtimit të tij, sot krimi është trefishuar e është bërë më i frikshëm për qytetarët, biznesmenët e këdo./Pamfleti
