Kandidati i pushtetit për Bashkinë e Shkodrës, Benet Beci, posedon një pasuri përrallore nga Shkodra deri në Voskopojë, bazuar, sipas tij, në paga, të tijën si drejtori më jetëgjatë i të gjithë pushteteve në krye të FSHZH-së dhe të bashkëshortes si mësuese.
Ish drejtori emblematik i Sali Berishës në krye të Fondit Shqiptar të Zhvillimit, i lakuar për afera dhjetëra milionë euro me rrugët jashtë standarteve, ka përfituar një shtëpi si i pastrehë nga Enti Kombëtar i Banesave, ashtu siç kanë përfituar edhe Ridavan Bode, Flamur Noka, Fatmir Mediu etj.
Benet Beci, i cili në vitin 2013 flirtoi me Rilindjen duke u bërë drejtori i vetëm që i shpëtoi rotacionit politik, posedon edhe një shtëpi në Gjirin e Lalzit, oaz simbol i korrupsionit të tranzicionit shqiptar.
Vitet e fundit ka blerë dy apartamente rreth 400 mijë euro, njërin nga të cilët e ka kthyer në biznes, qendra e gjuhëve të huaja Tirana Training Center me NIPT L72206048M, që administrohet nga bashkëshortja dhe dy fëmijët.
I biri merr paga sa në një biznes, sa tek Autoriteti i Konkorrencës dhe vitet e fundit tek Banka e Shqipërisë, ku Beneti ka qenë më parë anëtar i Këshillit Mbikqyrës.
Ka indicie të forta se Benet Beci mund të ketë përdorur biznesin e tij, qendrën e gjuhëve të huaja, për të pastruar paratë e korrupsionit si drejtor i FSHZH dhe më pas si drejtor i KESH-it.
Së pari, nuk dihet burimi i investimit për transformimin e brendshëm të apartamentit 244 m2 në biznes.
Së dyti, TTC ka gjeneruar fitime të konsiderueshme që vitet e para, para të cilat janë përdorur më pas për shumfishimin e pasurisë.
Shkodra është edhe një herë pa alternativë, duhet të zgjedhë mes Benet Becit një ish drejtori simbol korrupsioni të Sali Berishës dhe Edi Ramës dhe mes Bardh Spahisë, një kandidat pa vizion, pa program dhe përfaqësues i Sali Berishës dhe Ilir Metës, që përfaqësojnë listën e zezë, spiunazhin, krimin dhe korrupsionin në Shqipëri.
Pasuria e deklaruar e Benet Becit
Shtëpi 2 plus 1 në Gjirin e Lalzit, deklaruar 47 mijë euro
Apartament 244 m2 me vlerë 170 mijë euro
Apartament në Tiranë me vlerë 200 mijë euro
Garazhe 192 m2 në Tiranë për 7 mijë euro
Shtëpi 80 m2, përfituar si i pastrehë nga Enti Kombëtar i Banesave.
Shtëpi 2 plus 1 fituar nga privatizimi
Shtëpi 3 plus 1, blerë në 2005 për 35 milionë lekë
Tokë 3 mijë m2 në Prush të Tiranës
Biznesi qendra e gjuhëve të huaja Tirana Training Center, që e administrojnë fëmijët me gruan
Tokë 3 mijë m2 në Voskopojë
Disa makina luksoze
