Kjo hartë blu tregon edhe njëhërë disfatën më të madhe që pëson Syriza për të dytën herë rradhazi.
Klima brenda opozitës zyrtare është jashtëzakonisht e rëndë në sfondin e rezultateve përfundimtare të zgjedhjeve. Udhëheqësi i kësaj partie Alexis Tsipras, në deklaratën e tij pas përfundimit të rezultatit zgjedhor, u shpreh se për SYRIZA PS është mbyllur një cikël i madh historik.
Por pavarësisht kësaj Tsipras nuk e dha dorëheqjen nga kjo parti duke kërkuar reformimin e saj.
“Syriza do të marrë përsipër përgjegjësitë që i janë dhënë nga vota popullore. Me procese të koordinuara dhe kolektive do të vendosim ashtu siç i ka hije një partie demokratike, pjesëmarrëse do të paraqesim proceset për të marrë vendimet tona përfundimtare. Anëtarët e partisë do të thirren të na gjykojnë të gjithëve. Vetëkuptohet se në këtë proces kolektiv krijues të riformimit, unë do të jem i pari që do të vendos veten në gjykimin e anëtarëve të partisë.”
Mediat greke shkruajnë se ishte jashtëzakonisht e vështirë për partinë e Tsipras për të përmbysur një diferencë kaq të madhe në një periudhë kaq të shkurtër kohore. Pikëpyetja e madhe është nëse Tsipras do të kërkojë votëbesimin e anëtarëve të partisë para apo pas mbajtjes së kongresit të jashtëzakonshëm për të qëndruar në krye të Syriza edhe pas disfatës që pësoi.
Kongresi i partisë i cili pritet të mbahet në fund të vitit sipas shtypit grek vështirë se do të sjellë një kandidaturë rivale përballë Tsipras, i cila ka një potencial serioz për të qëndruar sërish në krye të partisë. Me 91% të votave të numëruara, Demokracia e Re e qendrës së djathtë kryeson me 40.5% të votave dhe 158 vende në parlamentin prej 300 vendesh.
Partia e Mitsotakis është më shumë se 20 pikë para Syriza-s, një parti radikale e majtë që fitoi zgjedhjet në 2015 në kulmin e një krize borxhi dhe që drejtoi vendin deri në vitin 2019, kur humbi nga Demokracia e Re.
