Sali Berisha komentoi me gjysmë zëri kërkesën e dorëzuar nga SPAK në Kuvend për arrestimin e Arben Ahmetajt. Ish-Kryeministri lëshoi në konferencën flirtimin e fundit me ish-ministrin e Financave, duke e këshilluar atë, që sipas Berishës, të bëhet bashkëpunëtor i drejtësisë.
SPAK e ka marrë Arben Ahmetajn nën akuzë për tre vepra penale, mes të cilave edhe ajo e korrupsionit. Hetimet kanë nisur në bazë të denoncimit 277 fraksion 1, që lidhet me dosjen e inceneratorit të Elbasanit.
Mes provave që ka SPAK janë edhe fatura të pagesave të hoteleve nga Klodian Zoto për Arben Ahmetajn, ndërsa prokurorët e posaçëm po hetojnë edhe burimin e të ardhurave për blerjen e një vile në Hamallaj nga partnerja e Ahmetajt.
Megjithëse SPAK e akuzon Ahmetajn për korrupsion në të paktën gjashtë raste, Sali Berisha, Ilir Meta dhe Monika Kryemadhi, që pretendojnë se janë opozita e vërtetë e vendit janë përpjekur që ta diferencojnë atë nga dosja e inceneratorit të Elbasanit.
Monika Kryemadhi i doli publikisht në mbrojtje, duke thënë se Ahmetaj nuk ka firmosur për inceneratorin e Elbasanit. Deklarata e Kryemadhit nuk ishte as naivitet politik, as e vërtetë. Ahmetaj rezulton se ka hedhur firmën më 14 prill si ministër i Sipërmarrjes.
Arsyeja e vërtetë që Berisha, Meta dhe Kryemadhi prej dy vitesh kanë marrë në mbrojtje Ahmetajn lidhet me faktin se ai ishte njeriu i tyre dhe që dyshohet se i ka dorëzuar LSI-së dokumentacionet mbi procedurat e dhënies së koncesionit për inceneratorin e Elbasanit.
Pavarësisht nga dëshmitë e dhëna nga anëtarët e komisionit të vlerësimit të ofertave, ku rezulton se Ahmetaj ka lozur indirect rol vendimtar në përcaktimin e procedurës së paligjshme të tenderimit, Berisha, Meta dhe Kryemadhi e morën në mbrojtje.
E morën në mbrojtje edhe duke sulmuar biznesmenë e njerëz që për publikun janë anonimë për përfitime nga koncesionet e inceneratorëve, duke mos parë elefantin në dhomën, që në rastin e inceneratorëve dyshohet se është Arben Ahmetaj.
Ky është shërbimi i fundit që i bëhet ish-zëvendëskryeministrit nga ana e opozitës, që për dy vite e ka mbajtur si të përkëdhëlurin e saj duke e veçuar nga dosja për të cilën ai sot akuzohet dhe rrezikon deri në 15 vite burg./ Vox News
