Pas një hezitimi të gjatë qeveria i ka dhënë dritën jeshile rikthimit të basteve sportive online. Këshilli i Ministrave ka miratuar këtë të mërkurë projektligjin, i cili do të lejojë aktivitetin e lotarive sportive, jo me pika fizike të lotove, por vetëm përmes internetit.
Sipas projektligjit të botuar në faqen zyrtare të qeverisë, në të gjithë vendin nuk do të jepen më shumë se 10 licenca.
Bastet online do të luhen përmes faqeve në internet, aplikacioneve apo platformave të tjera elektronike të dedikuara, të cilat do monitorohen nga Autoriteti i Mbikëqyrjes së Lojërave të fatit.
Subjektet që do licencohen duhet të përmbushin kushtin e të pasurit përvojë në fushën e lojërave të fatit në jo më pak se 3 shtete të BE/OECD dhe për jo më pak se 3 vjet.
Për krijimin e garancive për fituesit e lojërave të fatit, organizatorët do jenë të detyruar të ngurtësojnë një fond prej 120 000 000 (njëqind e njëzet milionë) lekësh në një llogari të veçantë bankare, në favor të Ministrisë së Financave”.
E gjithë procedura për licencimin e basteve online do të zgjasë për një periudhë 6 mujore, ku ministra përkatëse duhet të nxjerrë edhe aktet nënligjore.
Të ardhurat që do përfitohen nga bastet sportive online do të shkojnë për mbështetjen e projekteve në fushën e sportit, kulturës, inovacionit dhe teknologjisë së inovacionit.
Lotot sportive në vendin tonë u mbyllën më 1 janar 2019 dhe prej atëherë në vend janë konstatuar 4 035 adresa bastesh të paligjshme, ndërsa dhjetëra persona kanë rënë në pranga për ushtrim të aktivitetit të paligjshëm.
