Prej disa ditësh debati për shembjen e Teatrit Kombëtar ka zgjuar konflikte edhe mes aktorëve, të cilët janë përballur me njëri- tjetrin me mendimet e tyre pro dhe kundra.
Një situatë aspak e këndshme, që ka kaluar në ofendime personale ka lindur sot mes dy aktorëve të njohur shqiptarë, Arben Derhemi dhe Laert Vasili.
Ky i fundit ishte i ftuar mëngjesin e ditës së sotme në emisionin “Kafe In” të diskutonte në lidhje me prishjen e teatrit.
Gjatë kësaj kohe Arben Derhemi ka ndërhyrë në emision përmes një telefonate për t’u përballur me kolegun e tij, Laertin.
“Nuk kam fare punë me atë djalin që ke aty dhe s’më intereson fare. Do të luhet atje tek ai kapanoni, ai është kapanon, por është turp kur thuhet kapanon për Teatrin Kombëtar. Ai atje është një kapanon, i cili meriton vetëm përbuzje dhe ai është ndërtuar thjeshtë për t’i dhënë sytë njerëzve si puna e atij që ke aty në studio që janë militantë dhe njerëz pa karakter dhe pa dinjitet” – është shprehur Derhemi teksa i drejtohej prezantuesit të emisionit për Vasilin.
Pas kësaj Vasili ka reaguar duke i përmendur një shfaqje të vitit 2008 , ku sipas tij regjisori donte t’i vinte kazmën gjithë produksionit dhe Derhemi doli kundër të gjithë aktorëve dhe përqafoi regjisorin në fjalë.
Më tej ai shtoi se mirë do ishte të mbahej mend kush ka luftuar për teatrin e kush për interesa vetjake.
Pas kësaj Derhemi ka ndërhyrë duke thënë se Vasili para dy javësh mendonte se teatri nuk duhej shembur, gjë të cilën ai e mohoi duke thënë se gjithmonë ka qënë pro dhe për këtë mund të rishikohen intervistat e mëparshme.
“Kjo është një histori skandaloze dhe duket qartë që është vjedhje” – është shprehur më tej Derhemi, duke thënë se edhe vetë Gramoz Ruçi e Ilir Meta janë kundër shembjes së Teatrit Kombëtar.
Pas këtij debati Laert Vasili e mbylli duke thënë: “Ky njeri dhe në takimin me Ministren e Kulturës dhe Kryetarin e Bashkisë ndërhyri të më ndërpriste fjalën, të njëjtën gjë po bën tani dhe nëse do më thoshit në studio se do kisha një parazit në intervistën time nuk do të vija. Unë kam respektin të dëgjoj një njeri dhe ky njeri thotë që nuk e njoh atë djalin atje. Po ai djali është ai që erdhe i’u qave në 2008-en që s’të jepnin rrogën në Teatrin Kombëtar dhe të futi tek “Trojanët e Euripidit” duke vënë veten për ty tek regjisori grek. Ai djali të ka dhënë punë dhe rol në 2008-en”.
