Plazhe të ngjashme me Karaibet, peizazhe malore spektakolare, por edhe bunkerë“. Kështu nis një reportazh i gjatë i prestigjiozes gjermane “Der Spiegel” për Shqipërinë të cilën e konsideron si destinacionin më të pazakontë të udhëtimit në Evropë, por kurrë i mërzitshëm. Gazetari Claus Hecking e ka nisur shkrimin e tij nga ujërat e kaltra të Gjirit të Ksamilit.
“Është vjeshtë, uji është 25 gradë dhe ishte aq i qetë e i pastër, saqë mund të shohësh peshqit dhe gaforret e vogla poshtë teje ndërsa notoje”, thotë ai duke shtuar: “Oh sa e bukur është Shqipëria!” Qoftë për plazhet e ngjashme me Bora Bora në Ksamil, por edhe rrënojat e lashta të Butrintit apo ecjen nëpër peizazhet e thyer malore rreth Thethit dhe Valbonës”.
Gazetari thotë se Shqipëria e ka bukurinë edhe kur sheh bunkerët e diktaturës. Ai nënvizon se deri para pak vitesh Shqipëria ishte e panjohur dhe askush nuk e mendonte të kalonte pushimet në një shtet ogurzi ballkanik postkomunist.
“Dikur për shumicën e njerëzve Shqipëria ishte një vend bosh mes Greqisë dhe Kroacisë, por tashmë është pikërisht ky vend që po sfidon të gjithë me çmimet e tij”.
Gazetari thotë se tashmë Shqipëria e ka kaluar problemin me imazhin. “Der Spiegel” nënvizon se për shkak të nënvlerësimit mbetet ende një larg mbipopullimit të Kroacisë apo Italisë. Gazeta sugjeron vizitat në Butrint, Gjirokastër dhe Berat, por pa anashkaluar një udhëtim mes maleve të Thethit.
“Der Spiegel” thotë se Shqipëria është një destinacion i veçantë udhëtimi. Ndonjëherë aventureske, por asnjëherë e mërzitshme. INSTAT raportoi një rritje të turisteve gjermanë gjatë korrikut duke i renditur ata pas italianëve dhe polakëve.
