Pesë ditë pas ngjarjeve të ndodhura në Banjskë, ku sulmi i grupit paramilitar serb la të vdekur oficerin e policisë së Kosovës, Afrim Bunjaku, ngjarja duket se po “jehon” ende edhe në vende të tjera të rajonit. Së fundmi, një incident është regjistruar në Kroaci.
Në tabelën me mbishkrimin e Ambasadës së Republikës së Kosovës në Trg Kralja Tomislava në Zagreb, një autor i panjohur ka ngjitur një afishe me flamurin serb mbi stemën e Kosovës të premten mbrëma, të cilën përfaqësuesja e pakicave kombëtare, Ermina Lekaj Prljaskaj, e ka konsideruar si tentativë për të krijuar trazira.
Rasti është raportuar në polici dhe në Ministrinë e Punëve të Jashtme, tha Lekaj Prljaskaj, duke shtuar se është kërkuar mbrojtje policore. Ajo raportoi gjithashtu se ka reaguar policia dhe Ministria e Jashtme dhe ka shprehur shpresën që autorët të zbulohen në regjistrimet e kamerave. Lekaj Prljaskaj ka vlerësuar se ky është një provokim dhe se krijon panik për shkak të ngjarjeve të fundit në Kosovë, kur një polic i Kosovës dhe katër sulmues u vranë pas një përleshjeje mes një grupi serbësh të armatosur dhe policisë së Kosovës.
“Shpresoj që serbët që jetojnë në Kroaci të distancohen nga ky akt”, tha Lekaj Prljaskaj, i cili beson se ky incident po tenton të krijojë trazira në të gjithë rajonin. Kujtojmë se menjëherë pasi ndodhi Ministria e Jashtme e Kroacisë, e ka dënuar ashpër sulmin ndaj Policisë së Kosovës. Ata kanë dërguar ngushëllimet më të përzemërta familjes së policit të vrarë, duke theksuar se autorët duhet të sillen urgjentisht para drejtësisë. “Dënojmë fuqishëm sulmin e dhunshëm”, shkroi ministria e Jashtme kroate në Twitter, ndër të tjera.
