Opozita shqiptare po përgatit një skenar për të rrëzuar të gjithë reformën në drejtësi. Duke qenë se deri më tani ka ngërçe në Kushtetuese, Gjykatën e Lartë, në KLD apo prokurori, PD dhe LSI në shtator do të nisin një aksion me qëllim zhbërjen e reformës. Edhe pse një gjë e tillë do të jetë disi e vështirë, duke qenë se PD e LSI janë minorancë, palët janë duke shqyrtuar të gjitha mundësitë e mundshme me qëllim rishikimin e ligjeve. Një burim i tha gazetë se PD, LSI dhe partitë e tjera opozitare janë duke menduar të vendosin një sërë kushtesh në shtator përballë qeverisë, sidomos nëse nuk merret statusi kandidat, të cilat nëse nuk plotësohen do sjellin bojkote. Momentalisht janë 2 ligje të rëndësishme që presin të rishikohen, kjo për shkak se Gjykata Kushtetuese rrëzoi disa nene prej tyre. Bëhet fjalë për ligjin për statusin e gjyqtarëve dhe prokurorëve, ku janë rrëzuar 27 nene, dhe për ligjin për organet e reja të drejtësisë ku janë rrëzuar 6 nene. Këshilli i Legjislacionit nisi diskutimet me qëllim rishikimin e këtyre neneve, por u pezulluan mbledhjet dhe gjithçka është bllokuar. Gazeta u interesua pranë anëtarëve dhe puna do të rinisë në shtator. Por që të miratohen nenet e reja, duhen 84 vota dhe PD me LSI nuk do e japin votën nëse nuk rishikohen dhe nene të tjera në disa ligje, përfshirë dhe atë të vetingut. Gazeta ka mësuar se nëse KLGJ dhe KLP nuk bëhen funksionale deri në shtator, opozita po ashtu do të ndërmarrë një tjetër nismë për të shkarkuar Arta Markun dhe për të rishikuar dispozitat sa i takon çështjes së kryeprokurorit. Por ndryshimi i këtyre neneve nuk përjashtohet që të vendoset si kusht edhe gjatë reformës zgjedhore. Një tjetër lëvizje që do të ndërmarrin PD dhe LSI për të hedhur në erë të gjithë paketën e reformës në drejtësi, është dhe ankimimi i ligjeve në Kushtetuese. Sapo gjykata të konstituohet, atëherë do ketë ankimim të shumicës së ligjeve, pasi gjykata ka shumë nene që nuk ka dhënë vendim për shkak të mungesës së kuorumit.
PD-LSI me sytë nga SHBA
Deri më tani PD dhe LSI nuk kanë ndërmarrë asnjë nismë të tillë pasi kanë pasur kundër ndërkombëtarët. Ambasadori amerikan Donald Lu dhe ambasadorja e BE janë shprehur kundër rishikimit të ligjeve. Rasti më i drejtpërdrejtë ishte ai i mandatit të Arta Markut. PD propozoi ndryshime ne ligj dhe Kushtetutë dhe ambasadorët dolën kundër. Po ashtu ata kanë lëshuar kritika dhe për ankimimet në Kushtetuese. Por gazeta ka mësuar se tani PD dhe LSI i kanë kthyer mes tyre nga Uashingtoni. Ditët e fundit Berisha, Kryemadhi dhe Basha kanë qenë një zëri duke deklaruar se reforma në drejtësi u bë nga Soros, duke akuzuar dhe ambasadorët Lu dhe Vlahutin si të lidhur me të. I gjithë qëllimi i deklaratave është që SHBA të sjellë në Shqipëri një ambasador republikan dhe ai të mbështesë idetë e PD dhe LSI se reforma duhet të ndryshojë, pasi sipas tyre, babai i saj është George Soros. Burime shumë të sigurta i thanë gazetës se dhe vetë PD është duke lobuar që të vijë një diplomat republikan dhe më pas do tentohet të bindet se reforma në drejtësi ka nevojë për rishikim, pasi ajo është projektuar nga Soros që të kapet gjyqësori nga qeveria. Por nuk dihet sa do rezultojë i suksesshëm ky skenar, pasi BE do sjellë si ambasador një ekspert të drejtësisë, ndërsa nuk përjashtohet që dhe SHBA të bëjë të njëjtin gjë. /Kliti TOPALLI
