Detaje të reja janë zbuluar nga operacioni i SPAK ku janë lëshuar 11 urdhër arreste për anëtarët e dyshuar të një grupi kriminal pas zbërthimit të bisedave në aplikacionin SKY Ecc ku janë të përfshirë zyrtarë dhe ish-zyrtarë të lartë të policisë së Shtetit.
Shefi i Krimeve të Rënda, Dedan Gjoni në bashkëpunim me personazhin e njohur të krimit në Kukës, Bujar Gërmizi (Ajeti) dhe shtetasin Besmir Mustafi, po planifikonin vrasjen e dy vëllezërve në Britani.
Raportohet se shkak është përplasja për trafikun e drogës dhe se ky operacion i SPAK po zhvillohet paralelisht edhe në Spanjë për kapjen e autorëve të dyshuar të grupit kriminal.
“Bujar Gërmizi (Ajeti) në ’99 është dyshuar për grabitje të bankave me armë. Nga aplikacioni SKY rezulton se në bashkëpunim me Dedan Gjonin, shefi i krimeve të rënda të komisariatit nr.6 dhe Besmir Mustafi, po krijonte kushte dhe po planifikonte për të vrarë dy vëllezër në Britani, për shkak të përplasjeve për trafikun e drogës.
Është shpallur në kërkim ndërkombëtar, Ervin Mata, i cili dyshohet për trafik narkotikësh në kuadër të një grupi të strukturuar kriminal. Ervin Mata është personazh i njohur i botës së krimit. Operacioni po zhvillohet paralelisht Shqipëri dhe në Spanjë për të arrestuar persona të tjerë.
Dedan Gjoni akuzohet se jepte informacion dhe po planifikonte vrasjen e dy vëllezërve së bashku me Bujar Gërmizin dhe Besmir Mustafin. Nën dyshimet për përkrahje të autorit të krimit dhe pastrim parash është arrestuar edhe Erezen Breçani”
