Ministrja e Shtetit për Marrëdhëniet me Parlamentin, Elisa Spiropali, i cilësoi organizimet e Lulzim Bashës dhe Sali Berishës në kuadër të 33 vjetorit të themelimit të Partisë Demokratike si sallone çaji ku pjesëmarrësit kujtojnë kohët e vjetra.
Dje, në një emision televiziv, Spiropali theksoi se PD lindi si forcë politike që shpejt u përvetësua nga Berisha. Duke komentuar takimet e organizuara, Spiropali i cilësoi si faza finale e përvetësimit të PD.
“PD lindi si shpresë e shqiptarëve për të ndryshuar dhe për të pasur garë politike në vend. Afroi rreth vetes njerëz që besonin tek ndryshimi.
Ngjizi një forcë politike që shpejt u përvetësua. Ne po shohim në fazën finale të përvetësimit. Ngushtimin e qëllimit dhe arsyes pse PD ekziston, për një familje. Këtu flas për të dy sallat. Sepse edhe Luli ishte një “djalë politik” i Berishës, në sallën tjetër është Berisha me familjen e tij biologjike”, deklaroi Spiropali.
Ministrja shtoi se takimet e organizuara dukeshin si sallone çaji ku të pranishmit nuk kanë çfarë t’i thonë njëri-tjetrit përveçse të kujtojnë kohët e kaluara kur partia funksiononte.
“Të dyja sallat duken si sallone çaji ku njerëzit nuk kanë se çfarë i thonë njëri tjetrit përveçse vijnë e hanë dy kikirikë e kujtojnë kohët kur ishin një parti që funksiononte. Këtu duhet të ndodhë shkëputja e atyre personave që janë profesionistë të vërtetë dhe kanë se çfarë japin, por sot e kanë gojën të mbyllur. Nuk mendojnë se mund të hyjnë në ndonjë garë se gara është e mbyllur”, nënvizoi Spiropali.
