Një trafikant droge, thirret në zyrat e policisë me qëllimin për t’u nxjerrë në pritë tek kundërshtarët e tij. Skenari i denjë për filmat policeskë, sipas prokurorisë, ka për protagonist ish-shefin e krimeve të Komisariatit nr. 6, Dedan Gjoni.
Ai është arrestuar për sigurim të kushteve për të kryer vrasje, si pjesë e grupit të ish-zv/drejtori i Policisë së Tiranës, Erzen Breçani, por dyshohet të jetë i përfshirë në një tjetër ngjarje kriminale.
Burimet bëjnë me dije se hetuesit kanë arritur të gjejnë prova se Dedan Gjoni ka marrë pjesë në një tjetër vrasje, e cila ka mbetur në tentativë, kësaj here ndaj Xhevdet Plakut, një i dyshuar për trafik droge, që përdorte 25 identitete si kreu i një grupi të trafikut ndërkombëtar të drogës me qendër në Amsterdam.
Me kërkesë të SPAK, Gjykata e Posaçme firmosi dje 4 urdhër arreste dhe përveç Gjonit u ekzekutua nga Policia e Durrësit arrestimi i Rexhep Rapit, personazh i njohur me histori kriminale në Shijak, nipit të tij Algert Rapi dhe Dejvi Gjermeni, punonjës policie në atë kohë në Policinë e Durrësit, i arrestuar ditën e sotme në Limburg të Holandës, pas bashkëpunimit me autoritetet atje dhe INTERPOL. Po dje Gjykata e Posaçme la në fuqi masat e sigurisë për 4 të arrestuarit për sigurim kushtesh për të kryer vrasje.
Çfarë ka ndodhur?
Gjatë kohës që Dedan Gjoni ka qenë me detyrë më Komisariatin e Shijakut dyshohet se ka bashkëpunuar me Rexhep Rapin, njohur ndryshe si “Kepi Rrapi” për ekzekutimin e Plakut. Nga hetimet ka rezultuar se urdhri i krimit është dhënë nga Holanda. Ish-efektivi Dedan Gjoni ka thirrur në komisariat objektivin Xhevdet Plaku më 17 shtator 2019, ka raportuar te autorët orën që do e lironte si dhe u ka nisur foto të tij. Fatmirësisht, atentatorët janë tërhequr nga plani dhe vrasja nuk u krye.
Nuk dihet saktësisht pse Rexhep Rapi e donte të vdekur Xhevdet Plakun, por ky i fundit ka qenë nën akuzë nga Gjykata e Savonës për vrasjen e Sali Rapit dhe plagosjen e Alfred Hasës, por mori pafajësi. Sali Rapi u vra me dy plumba pistolete, armë që nuk u gjet kurrë. Rexhep Rapi rezulton të jetë arrestuar me armë pa leje në një lokal në vitin 2021.
Në mars 1991 u akuzuar se vrau në Portin e Durrësit për hakmarrje një banorë të Katund Sukthit me mbiemrin Çyrbja, ndërsa në mars 2023 u arrestua në Rinas me qëllim ekstradimi në drejtim të Italisë, i dënuar nga Gjykata e Genovas me 7 vjet burg për emigracion të paligjshëm, por ekstradimi nuk u krye pasi mori lirinë nga gjykata. Ndërkohë, Xhevdet Plaku, i njohur me nofkën “Akili” përdorte edhe 25 identitete të ndryshme gjatë kohës që ishte koka e grupit kriminal të trafikut të drogës në Amsterdam. Pakove të kokainës iu vinte emra sipas cilësisë së mallit, zakonisht emra të markave të shtrenjtave të drogës duke nënkuptuar cilësinë e lartë të saj.
Të arrestuar
1. Dedan Gjoni – Aktualisht në burg për tjetër krim, ish punonjës policie në Durrës
2. Rexhep Rapi – ish punonjës policie në Durrës
3. Dejvi Gjermeni – ish punonjës policie në Durrës, i arrestuar në Holandë
4. Algert Rapi – nipi i Rexhep Rapit
Akuza: Sigurimi i kushteve dhe i mjeteve materiale për të kryer vrasje”, në dëm të shtetasit Xhevdet Plaku, kryer në bashkëpunimin e posaçëm të grupit të strukturuar kriminal, “Grupi i strukturuar kriminal” dhe “Kryerja e veprave penale nga grupi i strukturuar kriminal dhe organizata kriminale”, parashikuar nga nenet 80, 28/4, 333/a dhe 334 të Kodit Penal. Dedan Gjoni ndodhet në arrest me burg prej 20 nëntorit 2023 i akuzuar për sigurim të kushteve për të kryer vrasje me grupin Breçani. Në këtë dosje ndaj tij janë dhe akuzat ‘Trafik narkotikësh’, ‘Grupi i strukturuar kriminal’, ‘Kryerja e veprave penale nga organizata kriminale dhe grupi i strukturuar kriminal’, “Sigurimi i kushteve dhe i mjeteve materiale për të kryer vrasje” dhe “Shpërdorim detyre”.
