Eksperti i kriminalistikës Ervin Karamuço, tha në një emision televiziv se Bejtja ka qenë bashkëpunëtor i bandave të Fushë Krujës në disa krime të kryera.
Ai theksoi se vrasja mund të jetë bërë nga vetë pjesëtarët e tjerë të bandës, pas çarjes së tyre, për të eliminuar dëshmitarët që mund të bëhen potencialisht të penduar të drejtësisë.
Karamuço tha se vrasja na çon tek ekzekutimi me snajper në Vlorë i Gëzim Sinomatit, pasi në të dyja atentatet u ul automati i energjisë elektrike dhe u fikën dritata.
“Kjo ngjarje mund të na çojë te vrasja me snajper në Vlorë, pasi ka patur fikje të dritave, ulje të automatit të energjisë elektrike. Nuk po them i njëjti grup, por e njëjta metodë. Mund të jetë një person në grup që ka marrë pjesë në planet dhe realizimet.
Ju e dini që grupet në Fushë Krujë bëjnë goditje që nga Shkodra deri në Sarandë, janë të lidhura me të gjitha grupet në të gjithë vendin, janë trans-kombëtare. Janë grupe që shkojnë në çdo cep të vendit dhe pauhen mirë. Bëjnë planin kryejnë goditjen dhe kthehen aty në strofullën e tyre ku ndihen të sigurtë.
Në rastin konkret viktima ka qenë i përfshirë në ngjarje kriminale dhe ka shumë informacion të mbledhura, duke filluar nga ngjarja e kryekomisarit Dritan Lamaj, me vrasjen e Santos, zhdukjen e vrasësit të dyshuar të Santos, Stafukës, ose të grupit.
Ai grup është i çarë më dysh tani. I kanë ndarë interesat dhe informacionet. Edhe midis bandave ka hyrë frika e bashkëpunëtorëve të drejtësisë dhe për të mos ndjerë asnjë rrezik ata kanë filluar t’i heqin një nga një ata që kanë informacione”, tha Karamuço.
