Një analist grek me emrin Sakis Moumtzis (Saqi Mumxhiu) në një shkrim për gazetën greke Kathimerini, pranon se Greqia është duke e humbur “lojën” me Fredi Belerin.
Ai thotë se politika në Greqi nu ka arritur të lexojë dot Edi Ramën, teksa kryeministri shqiptar “nuk ka zgjedhur anën e Greqisë”.
Në shkrimin e tij, analisti grek Mumxhiu sugjeron se Greqia duhet të kandidojë Fredi Belerin për Parlamentin Europian, ku ai mund të flasë duke ngritur çështjen e “minoritarëve” në Shqipëri.
Sipas tij, Greqia nuk duhet ta vrasë mendjen se çfarë do të thotë Europa apo SHBA.
Në fund ai thotë se Edi Rama zgjodhi rrugën e përplasjes me Greqinë dhe se duhet të përballet me pasojat.
“Në politikë, partia e fortë duhet të përkulë muskujt kur kjo bëhet e nevojshme; përndryshe, fuqia e saj gradualisht zbehet dhe vihet në dyshim. Në këtë rajon, Greqia është shteti më i fortë – sikur ta pranonin edhe vendimmarrësit.
Qëndrimi i kërkimit për të mbajtur një ekuilibër me çdo kusht çon në një ngërç në rastin më të mirë dhe një humbje në rastin më të keq. Dhe le ta pranojmë: Kur vjen puna te çështja Beleri, ne po humbasim”, përfundon ai.
