Shtetet e Bashkuara të Amerikës nuk janë vetëm një superfuqi globale në ekonomi dhe forca të armatosura, por edhe në sport. Ashtu si pritej, sportistët e SHBA-së janë më të suksesshmit në Lojërat Olimpike “Parisi 2024”. Amerikanët vetëm në fund, në ndeshjen përfundimtare, dolën në krye të listës së vendeve me më së shumti medalje.
Me triumfin e basketbollisteve amerikane në finale ndaj francezeve, SHBA-ja doli në vend të parë me 40 medalje të arta, 44 të argjendta e 42 të bronzta. Pra amerikanët gjithsej i kanë 126 medalje. Deri në finalen e fundit, e para ishte Kina me 40 të arta, 27 të argjendta e 24 të bronzta. Kina përfundon e dyta prej vendeve më të suksesshme.
I ka 91 medalje gjithsej. Por lista finale formohet në bazë të medaljeve të arta. Japonia është e treta me 20 të arta dhe 45 gjithsej. Australia i ka 18 të arta e 53 medalje gjithsej. Nikoqirja, Franca, renditet e pesta me 16 të arta dhe 64 medalje gjithsej. Pasojnë Holanda, Britania e Madhe, Koreja e Jugut, Italia e Gjermania. Kosova është e 73-ta me një të argjendtë e një të bronzët.
Shqipëria ndan pozitën e 80-të me dy të bronzta. 91 vende kanë fituar medalje në Lojërat e Parisit. Pra më shumë se gjysma e vendeve të botës kanë mbetur pa medalje. Ndërkohë, disiplina që simbolizon lojërat olimpike, maratona e famshme, pati emocionet e veta edhe tek femrat. Kështu, Sifan Hasan “u shty” me bërryla me Tigst Asefa, 150 metra larg finishit në maratonën olimpike, të dielën në Paris. Më pas e kaloi Asefan për ta fituar medaljen e tretë në Lojërat Olimpike të Parisit.
Hasan, që është e lindur në Etiopi dhe garon për Holandën, arriti rekord olimpik me 2 orë, 22 minuta e 55 sekonda. Maratona është prej garave kryesore në programin olimpik. Është vrapim në 42 kilometra e 195 metra. Asefa e Etiopisë fitoi medaljen e argjendtë, duke mbetur tre sekonda prapa. Hellen Obiri e Kenisë e fitoi medaljen e bronztë.
Ekipi i Etiopisë paraqiti protestë dhe kërkoi diskualifikim të Hasanit për pengim. Por ankesa u refuzua. Dukej sikur Asefa po e bllokonte Sifan Hasanin, që u pengua dy herë përpara se atletet të shkëmbenin bërrylat.
Sifan Hasan ngriti duart lart dhe bërtiti ndërsa kalonte vijën. Më pas e mbështjellë me flamur holandez nisi festën. Për 31-vjeçaren ishte medalja e tretë në garat e vrapimit në Paris. Ishte e bronztë në vrapim 5000 metra dhe po ashtu në vrapimin 10 mijë metra, të mbajtur vetëm dy ditë më parë.
Pra për pak ditë i ka vrapuar plot 62 kilometra dhe në një konkurrencë të jashtëzakonshme. Hasan tani i ka gjashtë medalje olimpike./Adriatik BALLA
