Imazhet e para të një arme të re ruse janë bërë publike nga mediat ndërkombëtare. Analistët rusë e paraqesin atë si një armë të re të projektuar nga inxhinierët e Moskës, ndërsa nga ana tjetër ukrainasit pretendojnë se është shpikje e tyre.
Imazhet e dronit flakëhedhës janë ende mbresëlënëse: pajisja hedh një substancë ndezëse me saktësi, pastaj vetë shkatërrohet. Qëllimi është i qartë: të eliminohen pozicionet e kamufluara në rreshtat e pemëve që karakterizojnë fshatrat e Ukrainës jugore. Ky është skenari kyç i të gjitha luftimeve të dy viteve të fundit: kontrolli i atyre vijave vendos për ecurinë e luftimeve.
Sipas disa burimeve, droni përdor termitin: një përzierje që digjet për një kohë të gjatë në tokë dhe depërton në strehimore, e përdorur tashmë në kokat e raketave ruse me efekte shkatërruese.
Burime të tjera megjithatë besojnë se është një substancë e ngjashme me napalmin. Një tjetër tmerr që materializohet në frontet e luftës.
Po ashtu, Rusia ka thënë se ka zhvendosur disa nga raketat e saj bërthamore në Bjellorusi dhe ka rritur një prani tashmë të konsiderueshme ushtarake në enklavën e saj Baltike, Kaliningrad. Kjo provokoi Poloninë fqinje të shpallte se është e gatshme të presë armët bërthamore të NATO-s.
Putin shpesh herë është mburrur se aftësitë bërthamore të Rusisë janë më të avancuara se ato të Amerikës dhe se “armët ekzistojnë për t’i përdorur ato”. Ai gjithashtu ka paralajmëruar se prania e trupave të NATO-s në Ukrainë mund të shkaktojë një luftë bërthamore. Asnjë shtet anëtar i NATO-s nuk ka vendosur deri më tani forca në Ukrainë.
Megjithëse presidenti Biden ka thënë më parë se kërcënimet bërthamore të Rusisë janë të besueshme, goditjet e vazhdueshme të Putinit pa veprim e kanë zbehur efektin e retorikës së tij. NATO ka thënë vazhdimisht se nuk ka shenja se Rusia po përgatitet të çlirojë arsenalin e saj bërthamor.
