Sylvinho është me disa dilema sa i takon emrave që do hedhë në fushë në dy ndeshjet e Ligës së Kombeve. Kombëtarja luan kundër Çekisë dhe Gjeorgjisë në transfertë, sfida këto që janë planifikuar për në 11 dhe 14 tetor.
Përveç pozicionit ku do luajë Nedim Bajrami, pjesa më e rëndësishme është gjendja e Berat Gjimshitit, i cili paçka se është në listë mund të mos udhëtojë drejt Tiranës për shkak të lëndimit.
Në portë pritet Strakosha, teksa prapavija do i besohet Hysajt, Kumbullës ose Gjimshitit, Ismajlit dhe Mitajt. Mesi i fushës me tre do jetë për Ramadanin, Asllanin dhe Laçin, ndërsa në krahun e majtë të sulmit duket pozicioni i Nedim Bajramit. Në krahun tjetër Asani në mbështetje të Dakut.
Një fitore dhe një humbje për kuqezinjtë deri tani në Ligën e Kombeve, që me tre pikë mbajnë vendin e dytë në Grupin B1 dhe dy sfidat e radhës janë shumë të rëndësishme për objektivin.
Shqipëria 4-3-3: Strakosha; Hysaj, Kumbulla (Gjimshiti), Ismajli, Mitaj; Ramadani, Asllani, Laçi; Asani, Bajrami, Daku Trajner: Sylvinho
