Eksportet e Shqipërisë me Kosovën kanë pësuar një tjetër rënie drastike gjatë muajit shtator. Sipas të dhënave zyrtare nga Instituti i Statistikave, vendi ynë ka eksportuar 40% më pak mallra me shtetin e Kosovës në krahasim me shtatorin e vitit të kaluar. Vendet e tjera të rajonit me të cilat Shqipëria ka pasur uljen më të madhe të eksporteve janë Italia dhe Greqia. Konkretisht, eksportet me Italinë shënuan një rënie me 22% dhe ato me Greqinë gati 8%.
Edhe produktet që kemi marrë nga rajoni kanë qenë më pak, sidomos me Maqedoninë e Veriut dhe Italinë. Përkatësisht, importet me Maqedoninë e Veriut ranë me 29% dhe ato me Italinë 9%. Megjithatë, produktet e importuara nga shteti grek kanë qenë ato që kanë shënuar rritjen më të madhe me 16%.
Por, cilat kanë qenë ato pak produkte që kemi eksportuar dhe importuar nga rajoni?
Nga të dhënat më të fundit rezulton se materialet e ndërtimit dhe metalet kanë qenë produktet që kemi eksportuar më tepër në Kosovë, ndjekur nga ushqimet, pijet dhe duhani. Ndërkohë që me Italinë kemi eksportuar kryesisht tekstile dhe këpucë. Gjithashtu, edhe mallrat që kemi dërguar në Greqi kanë qenë më së shumti veshmbathje dhe produkte të tjera tekstile.
Nga ana tjetër, mallrat që ne kemi marrë nga Italia kanë qenë kryesisht makineri, pajisje dhe pjesë këmbimi në shtator të këtij viti, ndërsa nga Greqia kemi importuar ushqim, pije dhe duhan.
