Kombëtarja shqiptare e futbollit luan këtë muaj dy ndeshjet e fundit në Grupin B1 të Ligës së Kombeve. Më 16 dhe 19 nëntor në “Air Albania” duke nisur nga ora 20:45 përballë do jenë Çekia dhe Ukraina.
Tanët me gjashtë pikë janë në vendin e tretë (me pikë të barabarta me vendin e dytë, Gjeorgjinë) dhe kërkojnë kreun për të pasur shanse të vijojnë më tej. Ndeshja e parë i gjen tanët përballë kryesuesve të Çekisë (7 pikë).
Problemi më i madh për trajnerin Sylvinho është mungesa e pesë lojtarëve kyç. Broja, Manaj, Gjimshiti, Bare dhe Kumbulla janë zyrtarisht jashtë për shkak të dëmtimeve dhe braziliani e ka një ide se kë emra do hedhë në fushë me skemën 4-3-3.
Në portë Strakosha, mbrojtja i përket Hysajt, Ajetit, Ismajlit dhe Mitajt. Ndërkohë në mesin e fushës projektohen Asllani, Ramadani dhe Laçi. Në majën e sulmit duket Tuci, që është në balotazh me Uzunin. Bajrami dhe Asani në mbështetje të sulmit.
Nuk përjashtohet mundësia që Uzuni ose Muçi të kalojnë në krah, ndërsa lëviz Nedim Bajrami në mesin e fushës ose në rolin e fantazistit, duke lënë jashtë Laçin dhe ndryshimin e skemën në 4-2-3-1.
Formacioni i mundshëm:
Varianti 1 (4-3-3): Strakosha; Hysaj, Ismajli, Ajeti, Mitaj; Asllani, Ramadani, Laçi; Bajrami (Uzuni), Asani, Tuci (Uzuni)
Varianti 2 (4-2-3-1): Strakosha; Hysaj, Ismajli, Ajeti, Mitaj; Asllani, Ramadani; Muçi (Uzuni), Bajrami, Asani, Tuci
