Sot Gazment Bardhi është rreshtuar krah Sali Berishës, por akuzat e tij në drejtim të ‘babait të Xenit’ me zë dhe figurë nuk mund të harrohen.
Redaksia e Shqiptarja.com po rikthen një akuzë që Gazment Bardhi bënte në nëntor të vitit 2021 se Suel Çela ishte në shërbim Sali Berishës.
I rreshtuar asokohe krah Lulzim Bashës, në një konferencë publike, Gazment Bardhi tha se Suel Çela është angazhuar në mbështetje të ‘Foltores’ dhe Berishës për të mbledhur firmat që i duheshin për Kuvendin Kombëtar të PD.
Madje, Bardhi asokohe akuzoi se Suel Çela thërriste drejtues të PD në Elbasan dhe u vendoste përpara formularin për nënshkrim, e madje e gjitha kjo bëhej me dijeni të Sali Berishës dhe Flamur Nokës.
“Unë nuk flas në telefon me Suel Çelën. E kam pasur përballë në fushatën e 25 prillit dhe sot Suel Çela punon për Berishën. Nuk jam marrë unë. Dhe sot ky individi që e kemi pasur përballë në zgjedhjet e 25 prillit thërret drejtues të PD në Elbasan dhe i vendos përpara formularin për nënshkrim.
E di dhe Flamur Noka se ka qenë para dy ditësh i thirrur nga ata që kanë besuar te demokratizimi i Partisë Demokratike, pikërisht për këtë çështje, se nuk të pranojnë demokratët e Elbasanit t’ua mbledhë Kuvendin Kombëtar të PD, Suel Çela.”-tha Bardhi në 2021.
Pra, nga akuzat e Gazment Bardhit kuptohet qartë se si Suel Çela dhe organizata e tij kriminale ishin në shërbim të Sali Berishës në luftën që ai të merrte Partinë Demokratike nga duart e Lulzim Bashës, duke e ndihmuar që të mblidhet firmat për Kuvendin e PD.
Ndaj Suel Çelës, SPAK ka ngritur akuzën si drejtues i një organizate kriminale, ku për herë të parë nga Prokuroria e Posaçme ngrihet një akuzë e tillë, si niveli më i lartë i krimit të organizuar në vend. Ai shpesh është akuzuar dhe artikuluar edhe për lidhje me politikën, si ky rast i Gazment Bardhit. Madje, Suel Çela ndikonte edhe debatet poltike në vend, duke ndërtuar edhe ‘skaletat’ e emisioneve më kryesore, si rasti i ‘Opinion’.
