Teksa na ndajnë edhe pak muaj nga zgjedhjet e 11 majit 2025, Ilir Meta ka nisur fushatën nga qelia e paraburgimit te 313-a, ku ndodhet prej dy muajsh pasi akuzohet për korrupsion, pastrim parash e mosdeklarim të ardhurash.
Teksa kritikon qeverinë, Meta shkruan në facebook se rritja ekonomike e vendit vetëm nga sektori i ndërtimit, nuk është zgjidhje, pasi sipas tij vëmendja duhet nga bujqësia dhe industria, sektorë në tkurrje.
E meqë është në qeli për imazh Meta përdor arkivën e fotove të takimeve kur ka qenë president i Republikës.
“Përmbysja e modelit dhe strukturës ekonomike të vendit është zgjidhja dhe këtë e garantojnë 5 Prioritetet e Partisë së Lirisë, që si Prioritet të 5-të dhe final kanë shndërrimin e Shqipërisë në fuqi eksportuese.
Prioriteti i Edi Ramës është favorizimi i importuesve per konsum dhe jo të lëndëve të para për industritë vendase dhe shkatërrimi i prodhuesve vendas si në bujqësi, industri agropërpunuese dhe industri në përgjithësi. Si mund të krenohet me “fuqizimin” e lekut një vend që eksporton vetëm 8% të Prodhimit të Brendshëm Bruto, aq sa eksportonte edhe para 20 vitevesh kur Maqedonia e Veriut eksporton 54 % dhe vendet e rajonit 35%?
Mjafton vetëm rritja e të ardhurave në nivelin e vendeve të rajonit për të garantuar financim të sigurt të 5 Prioriteteve tona dhe çdo gjë është e realizueshme në një kohë rekord e brenda një mandati.
Shqipëria falë modelit të Narkoekonomisë eksporton sot 5,7 herë më pak se mesatarja e vendeve të rajonit dhe diferenca e saj përsa i takon volumit të eksporteve në raport me vendet e Ballkanit Perëndimor vjen duke u thelluar e përkeqësuar.
Nëse deri në fund të këtij viti pritet që vendi ynë të eksportojë vetëm 8% të PPB, për vitin 2025 parashikohet sipas edhe buxhetit të miratuar, që niveli i eksporteve të ulet më tej në 7,5% të PBB.
Ndërsa Maqedonia e Veriut parashikohet ta mbyllë vitin aktual me 53,1% të PBB në eksporte dhe vitin e ardhshëm me rritje në 53,7%. Apo edhe Serbia që pritet ta mbyllë këtë vit me 39,8% të PBB me eksporte dhe vitin e ardhshëm ta rrisë në 40,6% të eksporteve edhe pse atje kemi autokraci dhe jo një demokraci funksionale”, shkruan Meta ndër të tjera në facebook.
