Ish kryeministri Sali Berisha është paraqitur në SPAK për masën detyrim paraqitjeje për aferën Partizani. Si gjithnjë ka mobilizuar në protestë një grusht militantësh, të cilët i mbledh sa herë duhet të shkojë para prokurorëve të Posaçëm. Berisha sulmoi egërsisht kreun e SPAK-ut Altin Dumanin, duke u përbetuar se do të shkrinte SPAK-un.
Duke iu referuar një mesazhi të Ramës për deputetët socialistë, Berisha tha se Edi Rama dhe Altin Dumani kanë bërë marrëveshje për të shpëtuar nga goditja zyrtarët e lartë pranë Ramës. Ajo që Berisha nuk e deklaroi, por e nënkuptoi, është një goditje e fortë që pret kampi i tij. Në rrethet e SPAK, BKH, medias dhe politikës flitet se Shkëlzen Berisha dhe Flamur Noka janë shënjestra e radhës e SPAK-ut.
“Tani, çfarë gjeta unë aty. Aty ish-xhelatin e Sigurimit të Shtetit, Arben Kraja që po merrte një strajcë me pare nga Benet Beci dhe po pinin një kafe shtruar. Pra, një. Gjeta kurban Etjenin e Fatmir Xhafës, kurban të marrëveshjes Rama-Dumani. Sepse Etjeni e shkeli marrëveshjen sipas të cilës nuk mund të sulmohet më Skapi pa autorizimin e plotë të Edi Ramës.
Marrëveshja është kufizimi, ndalimi i hetimeve për zyrtarët e lartë. Dhe pasi dështoi në bashkimin e votave me opozitën, pasi u përpoq të tërheqë opozitën në një akt antikushtetues dhe të papërgjegjshëm, u ul nëpërmjet Ulziut dhe firmosi marrëveshjen. Etjeni kishte mbetur aty, nuk dilte më nga Skapi…Edhe një gjë, është shumë interesante të lexoni aty ku firmos unë dëshminë që unë erdha, aty thotë procesverbali nuk mund të bëhet asnjë vërejtje.
Dhe unë pastaj bëj një fletë të veçantë ku i them: Prokuroria politike e Edi Ramës, e kukullës së Xhorxh Sorosit, me një krye mercenar Dumanin, është vegël e regjimit të tij dhe patericë e pushtetit të krimit, i cili merr fund me turp më 11 maj të vitit 2025. Ky është mesazhi për Edi Ramën që lashë në tavolinë”, tha Berisha.
