José Mourinho, trajneri portugez i njohur për stilet e forta dhe shpesh të papritura të sjelljes, ka rikthyer kujtimet e lavdishme nga periudha e tij tek Interi, gjatë një interviste për BBC, në kuadër të dokumentarit “Si të fitosh Champions League”.
Ai ka zbuluar një nga momentet më epike të karrierës së tij, një ndeshje që ka mbetur e paharruar për tifozët dhe të apasionuarit e futbollit: gjysmëfinalja e kthimit në “Camp Nou” ndaj Barcelonës.
“Të luash me 10 lojtarë në Barcelonë bëhet një moment epik. Duhet të kesh heronj, duhet të nxjerrësh më të mirën nga çdo lojtar. Mendoj se isha brilant në mënyrën se si e organizova skuadrën atë natë, – tha Mourinho. – Ne u mbrojtëm me të gjitha forcat tona, me zemër dhe shpirt. Kjo është humbja më e bukur e karrierës sime. Dhamë gjithçka, edhe pse humbëm 1-0, arritëm të kalonim në finale të Ligës së Kampionëve”.
Mourinho foli gjithashtu për momentin emocional të largimit të tij nga Interi, pas triumfit në Madrid, duke fituar Champions League: “U arratisa, shkova drejt autobusit për t’i përshëndetur lojtarët, por nuk ia dhashë dorën askujt. Doja të ikja.
Mendoj se po të kisha hipur në autobus dhe po të kthehesha me ta në Milano, po të shihja ‘San Siron’ plot me tifozë, po të kthehesha për të parë ‘Duomon’ të mbushur me njerëz, nuk do të shkoja te Real Madridi. Emocioni do të më kishte ndaluar, por e dija që ishte momenti i duhur për të shkuar te Real Madridi. Duhej të largohesha nga Interi”.
Ky rrëfim i hapur dhe i sinqertë nga Mourinho pasqyron jo vetëm pasionin e vendosmërinë e tij si trajner, por edhe emocionet që i kanë shoqëruar vendimet e mëdha në karrierë.
