Vetëm pak orë na ndajnë nga ngjarja më e madhe e muzikës Evropiane ndërsa emocionet sa vijnë e shtohen për shtetet pjesëmarrëse ashtu sikurse edhe për Shqipërinë e cila ka bërë një jehonë të madhe në mediat ndërkombëtare.
Shqipëria dhe Shkodra Elektronike vijon të jetë në qendër të vëmendjes edhe për shkak të sondazhit të shtypit pas provave gjenerale një ditë para nisjes së spektaklit muzikor ku është renditur e dyta në radhë, pas Suedisë.
37 gazetarë dhe përfaqësues të medias të cilët morën pjesë në votim, iu kërkua të votonin për tre provat e preferuara të ditës (duke përjashtuar ato që kualifikoheshin automatikisht). Shumica prej tyre kanë vlerësuar maksimalisht performancën shqiptare. I njëjti sondazh duket se do të realizohet edhe për shtetet pjesëmarrëse të gjysmëfinales së dytë në provën gjenerale në 14 maj, si edhe për provat gjenerale të finales së madhe në 16 maj.
Përveç sondazhit të shtypit, organizatorët do të zhvillojnë edhe Sondazhin e Audiencës, në bashkëpunim me gjashtë platforma të njohura televizive si ESC Insight, 12 Points From America, Eurovoix dhe That Eurovision Site ku publiku që del nga festivali do të pyetet për të preferuarin e tij . Shqipëria ka arritur të spikasë me një performancë mbresëlënëse, që ka tërhequr vëmendjen e të gjithëve, me veshjen me motive kombëtare dhe një stil unik.
Gjysmëfinalja e parë e Eurovizion 2025 do të mbahet në 13 maj, gjysmëfinalja e dytë në 15 maj si dhe finalja e madhe në 17 maj. Të treja netët e festivalit do të transmetohen ekskluzivisht në RTSH 1, Radio Tirana 1 si dhe RTSH Muzikë.
